Лукашэнка перакананы, што ў Еўропе “ачомаюцца” і стануць зноў купляць беларускія пялеты (дапоўнена)

дададзеныя абзацы 8–11

24 траўня, Позірк. Накіраваць “горы адкідаў” дрэваапрацоўкі на вытворчасць паліўных гранул — пялет даручыў Аляксандр Лукашэнка, наведваючы 24 траўня дрэваперапрацоўчы комплекс “Ляскавічы” нацыянальнага парку “Прыпяцкі” (Петрыкаўскі раён Гомельскай вобласці).

Паводле слоў палітыка, якія прыводзіць яго прэс-служба, улады Беларусі будуць “ажыццяўляць жорсткі ціск наконт укаранення катлавой гаспадаркі”, гэта “будзе ў прыярытэце”.

“І потым, куды падзець гэтыя адкіды? — задаўся ён пытаннем. — Трэба перапрацаваць у гранулы. І гэта наша перспектыва. Гэта ж золата. Мы ходзім, топчам яго нагамі, гэтыя горы складуем. Трэба гэта ўсё перапрацаваць і пусціць у справу. Гэта перспектыва. <…> Што такое пялеты? Гэта грануляваныя адкіды лесапілавання. Усё, што знікае ў лесе, мы здрабняем, робім гранулы і аддаём апальшчыкам, а яны топяць печкі. Мы вырабілі катлы, якія нядрэнна працуюць на пялетах. А выкарыстоўваем газ і нафтапрадукты. Нам трэба сваё. Прытым гэта адкіды. Гэтыя адкіды трэба перапрацаваць і дзе толькі можна абаграваць памяшканні”.

Лукашэнка заявіў, што некалькі гадоў таму, калі ён даручаў арганізаваць у Беларусі вытворчасць пялет, меркавалася, што гэты від паліва будуць пастаўляць на рынак Еўрасаюза.

“Так, санкцыі па нас ударылі: Еўропа ўсё гэта скупляла па пэўных цэнах, цяпер яны, ачмурэўшы, стрэлілі сабе ў нагу і гэта не купляюць. Маюць вялізную цану па электраэнергіі, па газе і гэтак далей. Яны ачомаюцца. Яны прыйдуць да нас”, — сцвярджае спікер.

З прычыны даступнасці прыроднага газу і нафтапрадуктаў, паводле слоў Лукашэнкі, выкарыстанню біяпаліва для ацяплення “надаецца не першарадная ўвага”, аднак, лічыць ён цяпер, беларусаў трэба было “адразу арыентаваць на выкарыстанне пялет”. “Нам трэба гэта развіваць на будучыню. Таму што нашыя дзяці таннага газу могуць не мець”, — заявіў палітык.

Міністр лясной гаспадаркі Аляксандр Кулік паведаміў, што ў Беларусі створана 64 вытворчасці, якія агулам выпускаюць каля 900 тыс. тон пялет на год.

Лукашэнка папярэдзіў Куліка, што продаж паліўных драўняных гранул павінен быць сам па сабе рэнтабельнай справай: “За кошт іншых напрамкаў ты выходзіш на рэнтабельную працу, а трэба, каб усе напрамкі былі рэнтабельныя”.

“Гэта твая задача, і супакойвацца нельга. Трэба глядзець навокал. Ты бачыш, да чаго ўсё ідзе. Санкцыі не вечныя. І, напэўна, у Еўропе паразумнеюць і будуць усё ж глядзець на тое, што ім выгадна. Але працаваць трэба і зараз”, — заявіў ён.

Улады Беларусі чакаюць, што ў 2025 годзе на ўнутраным рынку будзе рэалізавана больш як 70 тыс. т пялет, або “8% ад агульнай магутнасці вытворчасцей”. “Гэта мала. Нам трэба падумаць пра тое, як нам тут паскорацца. Трэба комплексна зірнуць на гэтае пытанне”, — заявіў Лукашэнка.

Пры наяўнасці “паліўнай кніжкі” кошт тоны паліўных гранул для насельніцтва складае 50 рублёў. На ацяпляльны сезон, як сцвярджаецца, неабходна каля 3,6 т пялет (агульны кошт — 180 рублёў).

30 снежня 2024 года Лукашэнка падпісаў указ № 475 “Аб кампенсацыі выдаткаў на набыццё кацельнага абсталявання, якое працуе на драўняных паліўных гранулах (пялетах)”. Дакумент прадугледжвае кампенсацыю 40% выдаткаў грамадзян (але не больш за 120 базавых велічынь, або 5.040 рублёў на гэты момант) на набыццё кацельнага абсталявання, вырабленага прадпрыемствамі Беларусі і арганізацыямі дзяржаў — членаў Еўразійскага эканамічнага саюза.

У эфіры тэлеканала “Беларусь 1” сёлета напрыканцы красавіка Кулік заявіў, што прадукцыя прадпрыемстваў, падпарадкаваных Мінлясгасу, “шырока выкарыстоўваецца ў Кітаі”, пробныя партыі накіроўваюцца ў Індыю.

“Нас у свеце шануюць. Я не буду параўноўваць з нашымі суседзямі, але нас шануюць. І таму наша прадукцыя запатрабаваная. Пытанне лагістыкі, яно таксама ўжо, я лічу, вырашанае. <…> Цяпер у нас у прапрацоўцы адно пытанне — гэта пялеты”, — сказаў чыноўнік, адзначыўшы, што ў краінах, куды іх “можна было б адгружаць”, цёплы клімат, “там яны пялетамі не топяць”.

Паводле слоў міністра, маецца “пара краін”, што “сур’ёзна зараз пачынаюць займацца экалогіяй, якія топяць зараз вуглём”. “І вось ужо ў нас маюцца напрацоўкі і пробныя партыі адгружаныя”, — заявіў Кулік.

“Таму мы ў тры разы павялічылі рэалізацыю пялет адносна мінулага года”, — паведаміў міністр, не назваўшы канкрэтных лічбаў.