Украіна і РФ другі дзень запар абменьваюцца палоннымі на тэрыторыі Беларусі

24 траўня, Позірк. Украіна і Расія 24 траўня ў чарговы раз абмяняліся палоннымі на тэрыторыі Беларусі — па 307 з кожнага боку, вынікае з паведамлення прэс-службы Міністэрства абароны РФ.

“Цяпер расійскія вайскоўцы знаходзяцца на тэрыторыі Рэспублікі Беларусь, дзе ім аказваецца неабходная псіхалагічная і медыцынская дапамога, — адзначае ваеннае ведамства. — Усе расійскія вайскоўцы будуць дастаўленыя ў Расійскую Федэрацыю для праходжання лячэння і рэабілітацыі ў медыцынскіх установах Мінабароны Расіі”.

Заяўляецца, што “ініцыяваны расійскім бокам маштабны абмен будзе працягнуты”.

Інфармацыю пра абмен пацвердзіў прэзідэнт Украіны Уладзімір Зяленскі.

Напярэдадні бакі перадалі адзін аднаму па 270 ваеннапалонных і 120 грамадзянскіх асоб.

Усё гэта частка найбуйнейшага ад пачатку расійска-ўкраінскай вайны абмену палоннымі — у фармаце “1.000 на 1.000”, пра які бакі дамовіліся па выніках нядаўніх перагавораў у Стамбуле.