Міністры абароны краін АДКБ абмяркуюць пагрозы ваеннай бяспецы 28 траўня ў Бішкеку

27 траўня, Позірк. Абмен меркаваннямі пра выклікі і пагрозы ваеннай бяспецы адбудзецца 28 траўня ў Бішкеку (Кыргызстан) на чарговым пасяджэнні Савета міністраў абароны дзяржаў — членаў Арганізацыі Дагавора аб калектыўнай бяспецы (АДКБ).

Паводле інфармацыі беларускага ваеннага ведамства, бакі таксама абмяркуюць пытанні, звязаныя з “сумеснай падрыхтоўкай органаў кіравання і фарміраванняў сіл і сродкаў сістэмы калектыўнай бяспекі”, а таксама бюджэтам АДКБ на 2026 год.

У пасяджэнні апрача міністраў абароны, як чакаецца, возьмуць удзел генеральны сакратар АДКБ Імангалі Тасмагамбетаў і начальнік Аб’яднанага штаба ваенна-палітычнага блока Андрэй Сердзюкоў.

У АДКБ уваходзяць Арменія, Беларусь, Казахстан, Кыргызстан, Расія і Таджыкістан.

Разам з тым вялікая верагоднасць, што армянскі міністр абароны праігнаруе пасяджэнне 28 траўня ў Бішкеку.

Улады Арменіі замарозілі ўдзел краіны ў АДКБ і загаварылі пра магчымы выхад з блока. Ерэван абвінаваціў арганізацыю ў бяздзейнасці падчас карабахскага канфлікту з Азербайджанам, а асобных членаў — у тым, што яны “планавалі вайну” супраць Арменіі разам з Баку.