Кіраўнікі вайсковых дзяржСМІ абмеркавалі ў Іране “пытанні па супрацьдзеянні інфармацыйным пагрозам”
29 траўня, Позірк. Пра візіт у Іран “кіраўнікоў вайсковых СМІ” паведамляе прэс-служба Міністэрства абароны.
Дэлегацыю Беларусі, як адзначаецца, узначальвае начальнік упраўлення інфармацыі — намеснік начальніка галоўнага ўпраўлення ідэалагічнай работы Мінабароны Аляксей Ціцкі.
“Падчас двухбаковай сустрэчы кіраўнікі дэлегацый абмеркавалі развіццё супрацоўніцтва ў сферы вайсковай журналістыкі, інфармацыйнай і культурнай дзейнасці, пытанні па супрацьдзеянні інфармацыйным пагрозам, а таксама перспектывы ўзаемадзеяннямі паміж вайсковымі ведамствамі дзвюх краін, уключаючы магчымыя сумесныя медыяпраекты, у тым ліку па асвятленні розных бакоў традыцый і культур Беларусі і Ірана”, — гаворыцца ў паведамленні.
Ціцкі “выказаў упэўненасць”, што “супрацоўніцтва ў інфармацыйнай сферы вайсковых ведамстваў Беларусі і Ірана будуць развівацца на аснове дружбы і ўзаемных інтарэсаў”, адзначылі ў Мінабароны.
Хто ўдзельнічаў у сустрэчы з іранскага боку не ўдакладняецца.
Дзейнасць Мінабароны ў Беларусі асвятляе дзяржаўнае інфармагенцтва “Ваяр”.
Мінск і Тэгеран актыўна развіваюць супрацоўніцтва ў многіх сферах, уключаючы вайсковую.
12 сакавіка гэтага года міністр абароны Віктар Хрэнін і міністр абароны і падтрымкі Узброеных сіл Ірана Азіз Насірзадэ абмеркавалі ў Мінску “бягучы стан двухбаковага ваеннага супрацоўніцтва” і “шляхі яго інтэнсіфікацыі ў галінах, якія ўяўляюць узаемную цікавасць”. Па выніках сустрэчы быў падпісаны “выніковы пратакол візіту”.
Падчас візіту Аляксандра Лукашэнкі ў Іран у 2023 годзе была падпісаная дарожная карта ўсебаковага супрацоўніцтва на 2023–2026 гады.
Лукашэнка і прэзідэнт Ірана Масуд Пезешкіян сустракаліся на палях саміту БРІКС у кастрычніку 2024 года.
13 жніўня 2024 года “пытанні ўзаемадзеяння ў інфармацыйнай сферы” на сустрэчы ў Мінску абмеркавалі начальнік галоўнага ўпраўлення ідэалагічнай працы Міністэрства абароны Беларусі Леанід Касінскі і кіраўнік дэпартамента сродкаў масавай інфармацыі Генеральнага штаба Узброеных сіл Ірана Маджтаба Абдалмалекі.
Летась 7 жніўня паведамлялася пра перамовы ў Тэгеране камандуючага ВПС і войскамі СПА Беларусі Андрэя Лук’яновіча з камандзірам ВПС Ірана Хамідам Вахедзі.
31 ліпеня 2024 года дэлегацыя Міністэрства абароны і падтрымкі Узброеных сіл Ірана падчас візыту ў Мінск абмеркавала з беларускімі калегамі перспектывы супрацоўніцтва ў сферы інжынернага забеспячэння.
16 траўня 2024-га ў Міністэрстве абароны Беларусі ўпершыню з моманту ўстанаўлення дыпламатычных стасункаў (18 сакавіка 1993 года) быў акрэдытаваны ваенны аташэ пры пасольстве Ірана ў Расіі і Беларусі (па сумяшчальніцтве) капітана першага рангу Рэза Хосраві Могадам.
2 траўня летась стала вядома, што ў Тэгеране завяршыліся камандна-штабныя вучэнні “Пояс бяспекі 2024”, у якіх прымалі ўдзел беларускія вайскоўцы.
27 красавіка 2024-га Хрэнін на сустрэчы са сваім іранскім калегам Махамадам Рэзай Ашціяні заявіў пра гатоўнасць Беларусі “развіваць і ўмацоўваць” супрацоўніцтва з Тэгеранам ва ўмовах міжнародных санкцый. Ашціяні ў сваю чаргу адзначыў, што Іран і Беларусь “падзяляюць погляды на асноўныя рэгіянальныя і міжнародныя праблемы і заўсёды падтрымлівалі пазіцыі адзін аднаго”. Ён падкрэсліў “высокі патэнцыял” дзвюх краін “у ваенным і абаронным сектарах”, адзначыўшы “гатоўнасць Тэгерана да больш цеснага супрацоўніцтва з Мінскам”.
31 ліпеня 2023 года ў Тэгеране Хрэнін і Ашціяні падпісалі мемарандум аб ваенным супрацоўніцтве, дэталі якога дагэтуль невядомыя (аналітыкі амерыканскага Інстытута вывучэння вайны меркавалі тады, што міністры маглі абмяркоўваць магчымасць вытворчасці ў Беларусі іранскіх дронаў-камікадзэ).