МНС зноў занізіла звесткі аб смяротнасці на пажарах

1 чэрвеня, Позірк. Адзін чалавек памёр ад агню за мінулыя дзяжурныя суткі (з 6:00 31 траўня да 6:00 1 чэрвеня), вынікае з аператыўнай зводкі Міністэрства па надзвычайных сітуацыях.

Лятальны выпадак зафіксаваны ў Лагойскім раёне (Мінская вобласць).

У зводнай табліцы МНС указана, што з пачатку года ў Беларусі адбылося 3.156 пажараў — на 27,5% больш, чым за аналагічны перыяд мінулага года (2.476). Загінула 300 чалавек (+17,6%; 255).

Аб 300 ахвярах агню паведамлялася яшчэ 28 траўня. З тых часоў, паводле звестак ведамства, на пажары загінуў адзін чалавек, аднак агульная колькасць памерлых не змянілася. З 300 да 299 колькасць ахвяр была змененая на сайце МНС 31 траўня.

“Позірк” неаднаразова звяртаў увагу на заніжэнне статыстыкі смяротнасці на пажарах у зводках МНС. Папярэдні раз такое было два тыдні таму. У зводцы, апублікаванай 16 траўня, адзначалася, што з пачатку года на пажарах загінула 282 чалавекі. На наступны дзень Міністэрства адрапартавала аб адным загінулым за суткі, аднак у абагульненай табліцы значылася не 283 ахвяры, а 281.