Да 2030 года плануецца адрамантаваць 25 тыс. км дарог — Мінтранс
12 сакавіка, Позірк. Аб’ём фінансавання дзяржаўнай праграмы “Дарогі Беларусі” на бліжэйшыя пяць гадоў, да 2030 года, складае каля 19 млрд рублёў, паведаміў намеснік начальніка галоўнага ўпраўлення аўтамабільных дарог Міністэрства транспарту і камунікацый Сяргей Лявончык на прэс-канферэнцыі 12 сакавіка.
“У асноўным — 18 млрд рублёў — гэта сродкі з рэспубліканскага бюджэту. Мы разлічваем адрамантаваць і рэканструяваць не менш за 25 тыс. км аўтамабільных дарог агульнага карыстання”, — адзначыў чыноўнік.
Паводле яго слоў, гэта амаль у 1,5 раза больш за аб’ёмы, выкананыя ў мінулай пяцігодцы.
Рэканструкцыя дарог праводзіцца з выкарыстаннем цэменту і бетону, сказаў Лявончык.
Таксама “вялікае значэнне” будзе надавацца мастам, якіх у краіне эксплуатуецца больш за 5 тыс.
