У Беларусі з 1 верасня будуць павышаныя працоўныя пенсіі

24 жніўня, Позірк. У Беларусі з 1 верасня павялічваюцца працоўныя пенсіі, вынікае з указа Аляксандра Лукашэнкі № 288 ад 24 жніўня.

Як паведамляе яго прэс-служба, павышэнне складзе 5%.

Гэта другое павелічэнне пенсій у 2026 годзе — папярэдняе адбылося 1 лютага (+10%).

“Паводле папярэдняй ацэнкі, сярэдні памер пенсіі па ўзросце ў верасні 2026 года складзе 1.125 рублёў, — гаворыцца ў паведамленні Міністэрства працы і сацыяльнай абароны. — Гадавое павелічэнне складзе 145 рублёў (+14,8%)“.

Як і раней, адзначае ведамства, памер павелічэння працоўнай пенсіі ў кожнага пенсіянера “будзе свой у залежнасці ад працягласці стажу і велічыні заробку, улічаных пры вылічэнні яму пенсіі, а таксама устаноўленых даплат да асноўнай пенсіі”.

Паводле даных Мінпрацы, пенсіі будуць пераразлічаныя ў аўтаматычным рэжыме як непрацуючым, так і працуючым пенсіянерам, наведваць сацслужбы пенсіянерам не прыйдзецца. Не будуць улады і рассылаць апавяшчэнні, а таксама тэлефанаваць.

Чакаецца, што ў верасні выдаткі на выплату пенсій складуць каля 2,6 млрд рублёў, на іх павышэнне будзе накіравана 125 млн рублёў.

У Беларусі налічваецца больш за 2,3 млн пенсіянераў.