МАРГ удакладніў патрабаванні па забеспячэнні долі беларускіх тавараў у гандлі
24 жніўня, Позірк. Міністэрства антыманапольнага рэгулявання і гандлю (МАРГ) Беларусі ўдакладніла падыход да забеспячэння долі тавараў айчыннай вытворчасці ў крамах і гандлёвых сетках.
Як адзначае прэс-служба ведамства, адпаведная пастанова МАРГ ад 20 жніўня 2026 года № 48 прынятая з улікам таго, як выконваецца ўстаноўлены паказчык. Тэкст дакумента пакуль не апублікаваны.
Міністэрства адзначыла, што ў адпаведнасці з Планам развіцця гандлю і грамадскага харчавання па выніках 2026 года доля беларускіх тавараў у гандлі павінна скласці 58%. Аднак у першым паўгоддзі паказчык вырас толькі на 0,1 працэнтнага пункта і дасягнуў 54,6%.
Такім чынам, як вынікае з інфармацыі ведамства, за астатнія месяцы года айчынным таварам трэба будзе прыкметна павялічыць прысутнасць у гандлі, каб выйсці на вызначаны паказчык.
МАРГ таксама нагадаў, што Дактрына нацыянальнай харчовай бяспекі Беларусі да 2030 года прадугледжвае яе аптымістычны ўзровень — 80–85% уласнай вытворчасці.
Паведамляецца таксама, што пытанне пра долю тавараў айчыннай вытворчасці, згодна з даручэннем Аляксандра Лукашэнкі, будзе разгледжанае “на самым высокім узроўні” па выніках 2026 года.
Пра тое, што па выніках першай паловы 2026 года доля продажу тавараў айчыннай вытворчасці ў арганізацыях гандлю склала 54,6%, Белстат паведаміў 23 ліпеня. За апошнія 12 месяцаў гэты паказчык не змяніўся.
Згодна з праведзеным “Позіркам” аналізам даных ведамства, удзельная вага вырабленых у краіне харчовых прадуктаў, напояў і тытунёвых вырабаў склала 75,4% (75,8%; -0,4 п.п.), нехарчовых тавараў — 35,9% (34,4%; +1,5 п.п.).
За мінулы год агульная доля айчынных тавараў зменшылася на 2 п.п. (з 56,4% па выніках 2024-га да 54,4% па выніках 2025-га): харчовых прадуктаў, напояў і тытунёвых вырабаў — на 0,6 п.п. (з 76,3% да 75,7%); нехарчовых тавараў — на 2,4 п.п. (з 37,3% да 34,9%).
