Мінэнерга дала справаздачу аб аднаўленні энергазабеспячэння ўсіх населеных пунктаў, але больш за 40 спажыўцоў яшчэ без святла

23 жніўня, Позірк. Да 22 гадзін 22 хвілін 23 жніўня электразабеспячэнне ўсіх населеных пунктаў Беларусі адноўлена, паведаміла Міністэрства энергетыкі.

У той жа час усё яшчэ задзейнічаныя дзве дызель-генератарныя ўстаноўкі замест стацыянарнай сеткі і “вядзецца адпрацоўка 41 заяўкі спажыўцоў у сетках 0,4 кВ”. Гаворка ідзе пра лініі электраперадачы нізкага напружання (380-400 вольт), якія перадаюць ток ад трансфарматарных падстанцый да будынкаў.

Паводле інфармацыі Мінэнерга, за час непагадзі парушэнне электразабеспячэння фіксавалася “больш чым у 889 населеных пунктах”. Для ліквідацыі наступстваў стыхіі было задзейнічана “каля 397 аварыйных брыгад”, 471 адзінка тэхнікі, 52 дызель-генератарныя ўстаноўкі.

Непагадзь прынёс актыўны цыклон “Прыска”. Паводле даных МНС, ад паваленых дрэў пацярпела двое дзяцей (хлопчыкі 2014 і 2016 г.н. у Нясвіжскім і Мінскім раёнах).

Усяго зафіксавана падзенне 488 дрэў. Пашкоджана 15 аўтамабіляў і дахі 14 жылых дамоў, сельскагаспадарчых і адміністрацыйных будынкаў.