ЕАБР абнавіў прагноз па ВУП Беларусі: Пры адсутнасці новых шокаў можа скласці больш за 2% па выніках 2026 года
24 жніўня, Позірк. “Пры адсутнасці новых шокаў рост эканомікі Беларусі можа перавысіць наш прагноз і скласці больш за 2% па выніках 2026 года”, — гаворыцца у свежым штотыднёвым макрааглядзе Еўразійскага банка развіцця (ЕАБР).
Аналітыкі банка звярнулі ўвагу, што ў студзені — ліпені эканоміка краіны ў гадавым вымярэнні вырасла на 2,1% — “пасля 1,5% год да года ў студзені — чэрвені”.
“Ключавым фактарам паскарэння стала сельская гаспадарка: больш ранняя ўборка забяспечыла рост выпуску на 12,9% г/г (год да года. — “Позірк”.) пасля 4,7% г/г у I паўгоддзі, — адзначылі эксперты. — Выпуск прамысловасці павялічыўся на 0,1% г/г за студзень — ліпень пасля зніжэння на 0,7% г/г у студзені — чэрвені на фоне высокай унутранай спажывецкай і інвестыцыйнай актыўнасці, а таксама пашырэння попыту на паліва ў Расіі”.
“Рознічны тавараабарот вырас на 8,1% г/г, а інвестыцыі на 4% г/г за студзень — ліпень. Дададзеная вартасць сектара “Інфармацыя і сувязь” вырасла на 4,9% г/г на фоне павелічэння заказаў. Будаўніцтва працягвае аднаўляцца пасля спаду, звязанага з анамальна нізкімі тэмпературамі ў студзені — лютым 2026 года: аб’ём падрадных работ вырас на 2,3% г/г за студзень — ліпень”, — гаворыцца ў аглядзе.
На пачатку жніўня ЕАБР ужо абнаўляў свой прагноз па ВУП Беларусі, пагадзіўшыся, што гэты паказчык можа перавысіць 1,5% па выніках года. У чэрвені банк прагназаваў рост беларускай эканомікі ў 2026 годзе на ўзроўні 1,3% (план беларускіх уладаў — 2,8%).
