Сума ахвяраванняў на пахаванне памерлага ў Варшаве беларуса Пархаця дасягнула запытаных 30 тыс. злотых, збор працягваецца

24 кастрычніка, Позірк. Сабраная запытаная сума сродкаў на развітанне, перавозку цела і пахаванне ў Беларусі 50-гадовага беларуса Сяргея Пархаця (псеўданім Ян Памедор Рэуцкі), які памёр у Варшаве.

На поўдзень 24 кастрычніка 354 чалавекі ахвяравалі агулам 30.295 злотых (7,72 тыс. долараў) пры заяўленай мэце ў 30.000 злотых (7,64 тыс. долараў). Збор працягваецца, да завяршэння кампаніі засталося 88 дзён.

У апісанні кампаніі сябры Пархоця адзначылі, што арганізуюць збор, каб “годна развітацца” з ім і “дапамагчы яго сям’і ў гэты надзвычай цяжкі час”.

“Сабраныя сродкі мы накіруем на пакрыццё выдаткаў на пахаванне і развітанне з Памедорам у Варшаве, а таксама на арганізацыю транспартавання і перавозку яго цела з Польшчы ў Беларусь, дзе ён будзе пахаваны, — гаворыцца ў паведамленні. — Мы таксама хочам падтрымаць яго сям’ю, дапамагчы пакрыць выдаткі на выраб і ўсталяванне помніка, каб блізкія маглі годна ўшанаваць памяць Памедора і мець месца, куды змогуць прыходзіць, каб узгадаць дарагога чалавека”.

“Давядзецца вырашыць мноства складаных пытанняў, якія неабходна арганізаваць ужо цяпер і якія звязаныя са значнымі фінансавымі выдаткамі. Мы не хочам, каб гэты цяжар лёг выключна на яго блізкіх. <…> Кожны ўнёсак мае значэнне”, — падкрэслілі яны.

23 кастрычніка адзін з арганізатараў збору, сябар і калега Пархаця Яўген Скрабутан паведаміў “Позірку”, што польская паліцыя працягвае вывучаць абставіны смерці беларуса, прычыну кампетэнтныя органы гатовыя раскрыць толькі сваякам памерлага. Усе яны жывуць у Беларусі.

Сябар памерлага пацвердзіў, што Пархаця плануецца пахаваць у Беларусі. Калі гэта адбудзецца, пакуль невядома.

Пра смерць Пархаця стала вядома 20 кастрычніка.

Пархаць быў адным з аўтараў “Музыкальной газеты”, якая выдавалася ў Мінску і асвятляла падзеі на беларускай і сусветнай музычнай сцэне.

У 2012 годзе ён пераехаў у Польшчу, дзе стварыў групу “Беларусы ў Варшаве” ў “Фэйсбуку”. Яна аб’яднала каля 28 тыс. чалавек. Мужчына таксама працаваў барыста, адкрыў у польскай сталіцы кавярню Temperatura.