Травень стаў рэкордным месяцам ад пачатку года паводле колькасці спробаў нелегалаў трапіць з Беларусі ў ЕС
Польскі плот на мяжы з Беларуссю
2 чэрвеня, Позірк. Травень стаў рэкордным месяцам ад пачатку года паводле колькасці спробаў нелегальных мігрантаў трапіць з Беларусі на тэрыторыю суседніх дзяржаў Еўрасаюза, сведчыць праведзены “Позіркам” аналіз звестак іх памежных ведамстваў.
За пяць месяцаў года Літва, Латвія і Польшча зафіксавалі 15,3 тыс. спробаў парушэння мяжы, у тым ліку ў траўні — 6,8 тыс. (у красавіку — 4,4 тыс.).
На долю Літвы ў мінулым месяцы выпала 3,46% такіх спробаў, Латвіі — 32,92%, Польшчы — 63,62%.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, бо іх туды “паклікалі”.
