У траўні на волю выйшла больш за паўсотню палітвязняў — “Вясна”

3 чэрвеня, Позірк. Мінімум 51 палітвязень выйшаў на волю ў траўні 2025 года, 42 з іх — праз памілаванне, паведамляе праваабарончы цэнтр “Вясна”.

Паводле інфармацыі праваабаронцаў, усяго пасля адбыцця тэрмінаў з 2020 года з папраўчых устаноў вызвалілася больш за 1.550 палітвязняў. Адзначаецца, што рэальныя лічбы могуць быць большымі праз адсутнасць дакладных звестак.

7 траўня паведамлялася, што Аляксандр Лукашэнка “напярэдадні Дня Перамогі” памілаваў 42 чалавекі, асуджаных за “злачынствы экстрэмісцкай накіраванасці”. Сярод іх — 18 жанчын і 24 мужчыны; з іх 13 маюць хранічныя захворванні, адзін — інвалід. У 24 асуджаных непаўналетнія дзеці, двое — шматдзетныя, 10 чалавек старэйшыя за 50 гадоў, адзін дасягнуў пенсійнага ўзросту. Сцвярджаецца, што ўсе яны “хадайнічалі аб памілаванні, прызналі віну і раскаяліся ў здзейсненым”.

Па стане на 3 чэрвеня беларускія праваабаронцы прызнаюць палітвязнямі 1.183 чалавекі.