Лукашэнка жадае “раўнапраўнага дыялогу” са Швецыяй, зноў апелюе да яе “досведу нейтралітэту”

6 чэрвеня, Позірк. На працягу многіх гадоў шведы, як і беларусы, “старанна захоўваюць прыродную і культурную спадчыну роднага краю, будуюць стабільную прававую дэмакратычную дзяржаву”, заявіў Аляксандр Лукашэнка, віншуючы 6 чэрвеня народ Швецыі з Нацыянальным днём.

“На гэтым шляху да нядаўняга часу мы мелі добрыя вынікі двухбаковай супрацы”, — прыводзіць тэкст паслання прэс-служба віншавальніка.

Паводле слоў Лукашэнкі, “сёння, у перыяд глабальных трансфармацый, нязменнымі застаюцца галоўныя прыярытэты — захаванне навакольнага асяроддзя, павышэнне якасці жыцця і забеспячэнне нацыянальнай бяспекі”.

Віншавальнік у чарговы раз выказаў надзею на тое, што “досвед ранейшага нейтралітэту Швецыі” дапаможа кіраўніцтву гэтай краіны вярнуцца да “раўнапраўнага і паважлівага дыялогу, да аднаўлення якога Беларусь заўсёды гатовая”.

У віншаваннях Лукашэнкі на адрас Швецыі ў 2023 і 2024 гадах ужо гучала тэза пра нейтралітэт. У 2023-м палітык выказваў шкадаванне, што “сыходзіць у нябыт гэтая палітыка Швецыі, якая магла б стаць выратавальным прыкладам для мноства краін у Еўропе і свеце”, а ў 2024-м нагадаў шведам, што “народ некалькі стагоддзяў аддаваў свой голас за мірнае нейтральнае развіццё сваёй дзяржавы”.

На палях “Форуму Касцюшкі” сёлета 4 лютага ў Гданьску (Польшча) кіраўніца Аб’яднанага пераходнага кабінета (АПК) Святлана Ціханоўская і яе намеснік Павел Латушка абмяркоўвалі са шведскім міністрам па справах ЕС Есікай Русенкранц пытанні прыцягнення рэжыму Лукашэнкі да адказнасці.

Прэс-служба АПК сцвярджала, што бакі “дамовіліся аб правядзенні прававых кансультацый для абмеркавання ўсіх магчымых міжнародных інструментаў, якія садзейнічаюць прыцягненню да адказнасці Лукашэнкі і яго акружэння”.