Вільнюс перадаў Мінску ноту пратэсту ў сувязі з парушэннем літоўскай мяжы беларускімі пагранічнікамі
7 чэрвеня, Позірк. Міністэрства замежных спраў Літвы 6 чэрвеня ўручыла прадстаўніку амбасады Беларусі “ноту рэзкага пратэсту” ў сувязі з зафіксаваным парушэннем літоўскай мяжы беларускімі пагранічнікамі.
Паводле інфармацыі знешнепалітычнага ведамства Літвы, ад уладаў у Мінску запатрабавалі “як мага хутчэй даць тлумачэнне па гэтым інцыдэнце і зрабіць усе неабходныя захады для таго, каб у будучым такія выпадкі не паўтараліся”.
Служба аховы дзяржаўнай мяжы (САДМ) Літвы паведаміла 5 чэрвеня, што напярэдадні ўвечары супрацоўнікі заставы Юргіса Кібартаса Вільнюскага памежнага атрада “назіралі за трыма беларускімі пагранічнікамі, якія ішлі ўздоўж мяжы на баку Беларусі”.
“Лінія мяжы ў гэтым месцы абазначаная цэнтральным паліганаметрычным слупом, па абодва бакі якога ўсталяваныя дзяржаўныя памежныя знакі, — гаворыцца ў паведамленні. — Крыху далей углыб літоўскай тэрыторыі размешчаны фізічны бар’ер — плот з “канцэрцінаю” (загарода з калючага дроту з вострымі лёзамі. —“Позірк“.), прызначаны для абароны ад незаконнай міграцыі”.
“Паводле папярэдніх звестак, падчас гэтага патрулявання магло адбыцца перасячэнне мяжы на літоўскі бок да 2 метраў з неадкладным вяртаннем назад у Беларусь”, — сцвярджала САДМ.
Было заяўлена, што Вільнюскі памежны атрад збірае матэрыялы і ўдакладняе абставіны здарэння. Вырашаецца пытанне пра “ўзбуджэнне дасудовага расследавання па факце незаконнага перасячэння дзяржаўнай мяжы”.
У ліпені і жніўні 2023 года Дзяржпагранкамітэт Беларусі паведамляў пра кароткачасовыя парушэнні мяжы адпаведна літоўскім памежнікам і аўтобусам САДМ. Першы выпадак быў прызнаны літоўскім бокам, паводле меркавання якога, неспрактыкаваны на той момант памежнік мог заступіць за лінію мяжы “з неасцярожнасці”.
