У дачыненні да грамадзянкі Беларусі складзены адміністрацыйны пратакол за спробу ўвозу без дэкларавання 22 тыс. долараў

9 чэрвеня, Позірк. Адміністрацыйны пратакол складзены ў дачыненні да грамадзянкі Беларусі, якая спрабавала ўвезці ў краіну без дэкларавання 22 тыс. долараў, паведамляе Дзяржаўны мытны камітэт (ДМК).

Жанчына прыбыла ў Беларусь з Паўночнага Кіпра авіярэйсам праз Стамбул. Адзначаецца, што пры праходжанні мытнага кантролю ў Нацыянальным аэрапорце Мінск яна прад’явіла толькі 6.600 долараў і 3.000 турэцкіх лір (каля 77 долараў).

У аэрапорце пасажырка “прайшла па зялёным калідоры, тым самым заявіўшы аб адсутнасці тавараў, якія падлягаюць дэклараванню”, гаворыцца ў паведамленні, “супрацоўнікі мытні перанакіравалі грамадзянку ў чырвоны калідор для ажыццяўлення кантролю”.

ДМК звяртае ўвагу, што незадэклараваныя грошы “былі схаваныя ад мытнага кантролю цікавым спосабам: загорнутыя ў фальгу і схаваныя ўнутры упаковак з жаночымі гігіенічнымі сродкамі”.

Адміністрацыйны пратакол складзены паводле ч. 2 арт. 15.5 КаАП (недэклараванне перамяшчаемых праз мытную мяжу Еўразійскага эканамічнага саюза фізічнымі асобамі наяўных грашовых сродкаў і (або) грашовых інструментаў, якія падлягаюць мытнаму дэклараванню). Санкцыя гэтага артыкула прадугледжвае адказнасць у выглядзе штрафу ў памеры да 30 базавых велічынь з канфіскацыяй незадэклараваных наяўных грашовых сродкаў або без канфіскацыі.

22 траўня ДМК паведамляў, што 33-гадовы грамадзянін Беларусі, пасажыр рэйсавага аўтобуса Познань — Гомель, спрабаваў увезці без дэкларавання каля 42 тыс. долараў у эквіваленце. У дачыненні да яго была ўзбуджаная крымінальная справа паводле ч. 2 арт. 228 КК (незаконнае перамяшчэнне праз мытную мяжу Еўразійскага эканамічнага саюза ў буйным памеры наяўных грашовых сродкаў або грашовых інструментаў).