Галоўны ідэолаг Мінабароны заклікаў рыхтавацца да правакацый Захаду з “тэрарыстычнымі практыкамі”

18 чэрвеня, Позірк. “Усё часцей выкарыстоўваюцца тэрарыстычныя практыкі, ахвярамі якіх становяцца грамадзянскія асобы. Улічваючы, што ў дачыненні да нашай краіны Захад працягвае выношваць планы па дэстабілізацыі абстаноўкі, сілавы блок нашай краіны павінен быць гатовы да магчымых правакацый і нестандартных сітуацый з улікам сітуацыі ў рэгіёне”, — заявіў памочнік міністра абароны-начальнік Галоўнага ўпраўлення ідэалагічнай работы Міністэрства абароны Леанід Касінскі на “канферэнцыі ідэалагічных апаратаў дзяржаўных органаў сіл забеспячэння нацыянальнай бяспекі” 18 чэрвеня ў Мінску.

Паводле яго сцвярджэння, Беларусь “працягвае знаходзіцца ў эпіцэнтры найбуйнейшага ваенна-палітычнага крызісу ў рэгіёне, які зацягнуўся”.

“Мы бачым, што за шыльдай імкнення да міру на Украіне еўрапейскія краіны працягваюць паслядоўна павышаць градус эскалацыі”, — цытуе яго прэс-служба Мінабароны.

Паводле паведамлення ведамства, тэмай мерапрыемства была “практычная дзейнасць службовых асоб дзяржаўных органаў сіл забеспячэння нацыянальнай бяспекі <…> па падтрыманні маральна-псіхалагічнага стану асабовага складу на ўзроўні, які забяспечвае выкананне задач па прызначэнні”.

Удзельнікам былі прадэманстраваны “сучасныя тэхнічныя сродкі ідэалагічнай работы, якія стаяць на ўзбраенні беларускай арміі”.

У канферэнцыі прынялі ўдзел прадстаўнікі Дзяржсакратарыята Савета Бяспекі, Дзяржпагранкамітэта, ДМК, МУС, МНС, Следчага камітэта, Дзяржаўнага камітэта судовых экспертыз, Службы бяспекі прэзідэнта, Генпракуратуры, КДБ і Аператыўна-аналітычнага цэнтра пры прэзідэнце.

Мінск падтрымлівае Маскву ў развязанай ёю 24 лютага 2022 года поўнамаштабнай вайне супраць Украіны.