Кіраўнік КДБ: Абмеркаванне пытанняў з ЗША здольна прывесці да вырашэння праблем у Рэспубліцы Беларусь

22 чэрвеня, Позірк. Перамовы з ЗША і вызваленне палітвязняў звязаныя са знешняй сітуацыяй, вынікае з заяваў старшыні беларускага КДБ Івана Церцеля ў інтэрв’ю беларускаму дзяржаўнаму тэлебачанню.

“Фон, няпростая абстаноўка ў свеце, у рэгіёне. Мы бачым зоны канфліктаў. Таму прэзідэнтам Рэспублікі Беларусь, агулам нашай дзяржавай праводзіцца ўсё магчымае дзеля таго, каб дасягнуць кансенсусу, каб панізіць узровень эскалацыі“, — сказаў Церцель.

Паводле яго слоў, праводзіцца “серыя сустрэч кіраўніка дзяржавы, трэба сказаць, не толькі з амерыканскім бокам“. “Гэта стала вядома сёння. Я думаю, што час потым будзе паказаць і іншыя аспекты, але з амерыканскім бокам вось такога выніку мы дасягнулі“, — адзначыў кіраўнік КДБ.

“Трэба сказаць, што мерапрыемства (вызваленне 21 чэрвеня групы палітвязняў, у тым ліку Сяргея Ціханоўскага, мужа дэмакратычнага лідара Святланы Ціханоўскай. — “Позірк”.) праводзілася не спантанна. Гэта сістэмная праца, якая праводзіцца ўжо на працягу года, а можа, і больш“, — заявіў кіраўнік ведамства.

(Такім чынам, калі верыць Церцелю, кантакты пачаліся яшчэ з адміністрацыяй папярэдняга прэзідэнта ЗША Джо Байдэна. Амаль год таму, 2 ліпеня, Аляксандр Лукашэнка абвясціў аб памілаванні першай невялікай групы палітвязняў. — “Позірк”.).

Як сцвярджае кіраўнік КДБ,з Лукашэнкам сустракаліся “рознага ўзроўню прадстаўнікі амерыканскай адміністрацыі, абмяркоўваліся самыя розныя пытанні міжнароднага і ўнутранага парадку”. “Прыбыў генерал Келаг, вядомая асоба, асабліва давераная асоба прэзідэнта ЗША Трампа. А гэта сведчыць пра тое, што Рэспубліка Беларусь і ЗША знаходзяцца ў кантакце па многіх пытаннях, пра якія я не хацеў бы казаць, але абмеркаванне якіх здольна прывесці да вырашэння праблем у многіх рэгіёнах, напэўна, свету і, у прыватнасці, там, дзе мы з вамі жывем, у Рэспубліцы Беларусь“, — заявіў Церцель.