У Расіі згарэў чарговы аўтобус МАЗ
7 ліпеня, Позірк. У Іркуцку (РФ) 5 ліпеня загарэўся маршрутны аўтобус, паведамляе мясцовае аддзяленне Міністэрства па надзвычайных сітуацыях РФ.
Мяркуючы па апублікаваных фота, гаворка пра аўтобус Мінскага аўтамабільнага завода, у выніку ўзгарання транспартны сродак практычна цалкам згарэў.
Аўтобус загарэўся на прыпынку, гаворыцца ў паведамленні. Полымя на 20 квадратных метрах ліквідавалі шэсць супрацоўнікаў МНС з выкарыстаннем дзвюх адзінак тэхнікі. Пацярпелых няма.
Адміністрацыя Іркуцка паведаміла, што пажар узнік у маторным адсеку, аўтобус накіроўваўся па маршруце № 14, ён эксплуатаваўся з 2013 года, тэхагляд прайшоў 19 чэрвеня 2025-га.
Беларускія аўтобусы рэгулярна загараюцца падчас руху ў РФ і Беларусі, прычынай гэтага называюцца санкцыі, уведзеныя супраць МАЗа дэмакратычнымі краінамі, якія пазбавілі прадпрыемства часткі якасных камплектуючых.
Апошні падобны выпадак, пра які пісалі СМІ, быў зафіксаваны 14 траўня ў Варонежскай вобласці. Да гэтага аўтобусы гарэлі 5 красавіка ў Санкт-Пецярбургу, 23 сакавіка — у Кіраве, 13 студзеня — у Ліпецку.
Праблему з беларускімі аўтобусамі ўскосна прызнаў Лукашэнка, які заявіў 19 верасня 2023 года на сустрэчы з губернатарам Краснадарскага краю РФ Веніямінам Кандрацьевым, што прычына ўзгарання пасажырскага транспарту ў Пецярбургу крыецца ў адсутнасці “якаснага і своечасовага абслугоўвання”. Ён прапанаваў наладзіць тэхабслугоўванне на месцы сіламі беларускіх рамонтнікаў.
На прэс-канферэнцыі 25 кастрычніка 2024 года намеснік галоўнага канструктара па грузавой тэхніцы Мінскага аўтамабільнага завода Мікалай Лакотка заявіў, што прычынамі частага ўзгарання тэхнікі прадпрыемства ў РФ з’яўляецца парушэнне ўмоў і правілаў эксплуатацыі.
Паводле яго слоў, тэхніка “стала вельмі цяжкая, энерганасычаная, таму ўмовы эксплуатацыі і правілы эксплуатацыі ніхто не адмяняў”.
12 студзеня 2025 года расійскае інтэрнэт-СМІ “Фонтанка” апублікавала інтэрв’ю з кіраўніком камітэта па транспарце мэрыі Санкт-Пецярбурга Валянцінам Янакаевым, у якім чыноўнік адзначыў, што “пасля першых інцыдэнтаў з узгараннямі” МАЗу “было дадзена даручэнне” з боку віцэ-губернатара Санкт-Пецярбурга Кірыла Палякова разабрацца ў сітуацыі. Чыноўнік сцвярджаў, што беларускае прадпрыемства вырашыла праблему.
У траўні 2025 года на расійскім рынку рэалізаваныя 43 новыя аўтобусы Мінскага аўтамабільнага завода — у 5,4 раза больш, чым годам раней (8), сведчаць прааналізаваныя “Позіркам” звесткі агенцтва “АСМ-холдынг” (РФ). Пры гэтым за студзень — травень 2025 года на рынку РФ рэалізавана 117 аўтобусаў МАЗ (280; падзенне ў 2,4 раза).
