Прарасійскія актывісты сарвалі вечар памяці Ларысы Геніюш у Мінску
7 ліпеня, Позірк. Прызначаны на 8 ліпеня ў мінскай творчай прасторы Parason вечар памяці беларускай паэткі Ларысы Геніюш адменены пасля масавага пратэсту ў сацсетках прарасійскіх прапагандыстаў і актывістаў.
Пра гэта паведаміў у сваім тэлеграм-канале прарасійскі супрацоўнік тэлеканала СТБ Рыгор Азаронак.
Паводле звестак “Еўрарадыё”, на вечары памяці пра жыццёвы і творчы шлях Геніюш павінен быў распавесці паэт і даследчык літаратуры Міхась Скобла.
“Вечар выклікаў пільную ўвагу прапагандыстаў, у прыватнасці, на яго ў сваіх тэлеграм-каналах абрынуліся Рыгор Азаронак, Людміла Гладкая, Вадзім Гігін, Вольга Бондарава і іншыя. Праз нейкі час Азаронак з задавальненнем канстатаваў, што аб’ява пра вечар знікла”, — адзначае выданне.
Творчасць Ларысы Геніюш (1910–1983) стала вядомая ў Беларусі падчас кароткага перыяду нацыянальнага адраджэння ў 1990-х гадах. Яе “Выбраныя творы” 2000 года выдання ў жніўні 2023-га ўлады прызналі “экстрэмісцкімі матэрыяламі”.
З 1935 года і да арышту савецкімі спецслужбамі ў 1948-м Геніюш працавала ва ўрадзе Беларускай Народнай Рэспублікі ў Празе. Была ў зняволенні спачатку ў Чэхіі, потым у сталінскіх лагерах — ёй паставілі ў віну супрацоўніцтва з нацыстамі. Выйшла на волю ў 1956 годзе. Не была рэабілітаваная, нягледзячы на некалькі запытаў грамадскасці на гэты конт. Памерла ў Беларусі.
Праўладная газета ў артыкуле "У подзвігаў ёсць імёны" пра фільм "Жураўліны крык" ні разу не згадала аўтара сцэнара і аднайменнай аповесці Васіля Быкава
6 ліпеня, Позірк. Напярэдадні 3 ліпеня — чарговай гадавіны вызвалення Мінска ад гітлераўскіх войскаў, якая з 1997 года адзначаецца як Дзень незалежнасці Беларусі — значнае месца ў дзяржаўных СМІ традыцыйна займалі публікацыі на ваенную тэматыку і падкрэслівалася важнасць “захавання гістарычнай …
