У шэсць разоў павялічылася колькасць загінуўшых пры падзенні з вокнаў дзяцей — Генпракуратура

9 ліпеня, Позірк. Колькасць загінуўшых дзяцей пры падзенні з вокнаў у гадавым вымярэнні павялічылася ў шэсць разоў, вынікае з паведамлення Генеральнай пракуратуры ад 9 ліпеня.

“За мінулы перыяд 2025 года” пры такіх абставінах загінула шэсць дзяцей, тады як за аналагічную частку 2024-га — адно дзіця.

За мінулыя выходныя з вокнаў выпала трое дзяцей, усе выжылі, гаворыцца ў рэлізе.

Як паведамлялася, 1 ліпеня ў Оршы (Віцебская вобласць) васьмігадовае дзіця выпала з акна, размешчанага на балконе сёмага паверха і загінула.

У першым квартале 2025 года ад знешніх прычын у Беларусі загінулі 32 непаўналетнія, паведаміла ў маі аб’яднанне былых сілавікоў BelPol са спасылкай на атрыманы службовы ліст намесніка генпракурора Аляксея Стука ў Міністэрства адукацыі, Міністэрства працы і сацабароны і мясцовыя органы ўлады.

Адзначалася, што смяротнасць вырасла на 52,4% — з 21 выпадку (з якім перыядам праведзена параўнанне, у лісце не пазначана).

У 2024 годзе ў Беларусі ад знешніх прычын загінула 126 дзяцей — на 34% больш, чым у 2023-м (94).