Бізнесмен Машэнскі выйшаў з кіроўнага складу “Прэзідэнцкага спартыўнага клуба”
Аляксандр Машэнскі на агульным сходзе "ПСК" 21 траўня
12 ліпеня, Позірк. Прадпрымальнік Аляксандр Машэнскі выйшаў з цэнтральнага савета Рэспубліканскага дзяржаўна-грамадскага аб’яднання “Прэзідэнцкі спартыўны клуб” (“ПСК”), вынікае са звестак на сайце арганізацыі.
Верагодна, гэта адбылося на агульным сходзе цэнтральнага савета (ЦС) клуба 21 траўня 2025 года.
Як паведамляла прэс-служба Нацыянальнага алімпійскага камітэта (НАК), на сходзе нязменны старшыня “ПСК” Дзмітрый Лукашэнка (сярэдні сын Аляксандра Лукашэнкі) “быў абраны кіраўніком грамадскага аб’яднання на новы тэрмін”.
“Падчас працы сходу таксама абраны новы склад цэнтральнага савета. Упершыню ў яго ўвайшлі старшыня Беларускай тэніснай федэрацыі Сяргей Рутэнка і кіраўнік Беларускай федэрацыі барацьбы Алім Селімаў”, — гаварылася ў паведамленні НАК.
Пра іншыя змены ў складзе ЦС не паведамлялася.
Машэнскі прысутнічаў на агульным сходзе, гэта вынікае з фота, апублікаваных на сайце НАК.
Актуальны склад цэнтральнага савета "ПСК"
У кастрычніку 2024 года польскія СМІ паведамілі, што Машэнскі рэгулярна наведвае Варшаву, выкарыстоўваючы ў тым ліку аўтамабілі з дыпламатычнымі нумарамі (у той перыяд бізнесмен з’яўляўся ганаровым консулам Ісландыі ў Беларусі).
“Ён фінансуе розныя праекты, якія прыдумляе Аляксандр Лукашэнка, а ў чацвер збірае рэчы, садзіцца ў свой “Мэрсэдэс” са спецыяльнымі нумарнымі знакамі — чырвонымі, консульскімі — і кіроўца вязе яго ў Варшаву на выходныя. Тут — кавярні, рэстараны, на выхадныя некуды на самалёце з сям’ёй. Еўрапейскае жыццё”, — гаварылася, у прыватнасці, у сюжэце тэлеканала TVN24.
Таксама паведамлялася, што ў Польшчы Машэнскі мае бізнес-актывы.
Папярэдні склад ЦС "ПСК"
9 ліпеня 2025 года Польшча ўвяла ў дачыненні да Машэнскага нацыянальныя санкцыі. Абмежаванні ўключаюць замарожванне грашовых сродкаў і эканамічных рэсурсаў бізнесмена ў краіне, забарону на прадастаўленне яму любых сродкаў і эканамічных рэсурсаў, выключэнне з працэдур дзяржаўных закупак або конкурсаў. Таксама Машэнскі уключаны ў спіс замежнікаў, знаходжанне якіх на тэрыторыі Польшчы непажаданае.
Аляксандр Машэнскі вядомы ў асноўным у малочным (“Савушкаў прадукт”) і рыбаперапрацоўчым (“Санта Брэмар”) бізнесе. Займае 2-е месца ў топ-100 беларускіх бізнесменаў паводле версіі выдання “Беларусы і рынак”.
З 2012 года ўзначальвае Беларускую федэрацыю веславання.
Машэнскі неаднаразова сустракаўся з Лукшэнкам, быў яго даверанай асобай на прэзідэнцкіх выбарах 2010 года. Удзельнічаў у “таемнай” інаўгурацыі Лукашэнкі пасля выбараў 2020 года, фальсіфікацыя якіх прывяла да працяглых шматтысячных пратэстаў у краіне. Масавыя палітычныя рэпрэсіі, распачатыя ўладамі падчас той электаральнай кампаніі, не спыняюцца ў Беларусі дагэтуль.
11 траўня 2025 года аб’яднанне BelPol выпусціла фільм-расследаванне пра дзейнасць “Прэзідэнцкага спартыўнага клуба”, у якім гаворыцца, што арганізацыя з’яўляецца сродкам узбагачэння сям’і Лукашэнкі. Для гэтага выкарыстоўваюцца розныя карупцыйныя схемы. “ПСК” у расследаванні названы “інструментам для легалізацыі атрыманых дыктатарам Лукашэнкам і членамі яго сям’і хабараў і ўхілення ад выплаты падаткаў”.
“Прэзідэнцкі спартыўны клуб” быў заснаваны ў 2005 годзе. На сайце праекта гаворыцца, што ён займаецца “арганізацыяй маштабных спартыўных спаборніцтваў, развіццём спартыўнай інфраструктуры, дабрачыннасцю і выплатай імянных стыпендый”.
