Расія на 20% павялічыла пастаўкі ў Беларусь прадукцыі АПК

17 ліпеня, Позірк. У студзені — красавіку 2025 года расійскія вытворцы экспартавалі ў Беларусь аграпрамысловай прадукцыі на 1,1 млрд долараў — на 20% больш, чым за аналагічны перыяд 2024-га, паведамляе Федэральны цэнтр развіцця экспарту прадукцыі АПК Міністэрства сельскай гаспадаркі РФ (Аграэкспарт).

Каля 24% экспартнай выручкі прыйшлося на прадукцыю харчовай і перапрацоўчай прамысловасці, 22% — прадукцыю алейна-тлушчавай галіны, 10% — мясную прадукцыю, 6% — рыбу і морапрадукты, 4% — збожжавыя культуры.

У структуры паставак лідзіравалі сланечнікавы алей (рост у 4,8 раза, да 137 млн долараў), кандытарскія вырабы (+7%, да 112 млн) і свініна (+62%, больш за 100 млн).

Паводле ацэнкі Аграэкспарту, патэнцыял расійскіх паставак прадукцыі АПК у Беларусь да 2030 года перавышае 3,2 млрд долараў.

“Беларусь — адзін з ключавых нашых партнёраў у сферы АПК, што з’яўляецца следствам высокага ўзроўню інтэграцыі эканомік у рамках Саюзнай дзяржавы і ЕАЭС, лагістычнай блізкасці, адсутнасці гандлёвых бар’ераў, уніфікаваных патрабаванняў і падабенства спажывецкіх пераваг, — адзначыў кіраўнік цэнтра Ілля Ільюшын. — Усе гэтыя фактары абумоўліваюць высокую даступнасць беларускага рынку для расійскіх вытворцаў самай рознай прадукцыі АПК. Пры гэтым мы бачым магчымасці для далейшага паглыблення гандлёвага ўзаемадзеяння, а таксама супрацоўніцтва ў эканамічнай і навукова-тэхнічнай сферах”.

Эксперты галіны адзначаюць, што “добрым экспартным патэнцыялам” валодаюць такія пазіцыі, як “свініна, гатовая мясная прадукцыя (сыравэнджаныя і сыравяленыя каўбасы, слайсерная нарэзка), макаронныя вырабы, морапрадукты, шакаладныя кандытарскія вырабы”.

Раней паведамлялася, што Беларусь па выніках траўня 2025 года аказалася на першым месцы ў Еўразійскім эканамічным саюзе па росце цэн на прадукцыю жывёлагадоўлі.

Згодна з праведзеным “Позіркам” аналізам даных Еўразійскай эканамічнай камісіі, у цэлым у ЕАЭС цэны ў гэтым сегменце сельскагаспадарчай прадукцыі ў траўні не змяніліся, а з пачатку года сталі вышэй на 0,6%. У Беларусі яны выраслі на 1,1% і 2,9% адпаведна, Расіі — на 0,2% і 1,2%. У Кыргызстане знізіліся на 0,3%, але за пяць месяцаў выраслі на 7,8%; у Арменіі і Казахстане знізіліся за абодва часовыя прамежкі — на 0,4% (-5,4%) і 2,4% (-7,5%) адпаведна.

Параўнанне даных Дэпартамента статыстыкі ЕЭК, якое раней правёў “Позірк”, паказала, што па выніках студзеня — траўня 2025 года Беларусь зноў заняла апошняе месца ў ЕАЭС па дынаміцы сельгасвытворчасці.

У цэлым па саюзе (за выключэннем даных па Арменіі, якія прыводзяцца раз у квартал) за пяць месяцаў зафіксаваны рост на 1,8% (тут і далей у гадавым вымярэнні): у Казахстане — на 4%, Кыргызстане — на 3%, Расіі — на 1,5%; у Беларусі адзначана зніжэнне на 1%. У Арменіі за тры месяцы фіксаваўся рост на 10%.

Эканоміка

Эканоміка

У студзені — кастрычніку 2024 года Расія паставіла ў Беларусь мяса на 226 млн долараў

22 студзеня, Позірк. Беларусь уваходзіць у тройку імпарцёраў расійскага мяса, вынікае з інфармацыі федэральнага цэнтра развіцця экспарту прадукцыі АПК Мінсельгаса РФ. Паводле афіцыйных звестак, за студзень — кастрычнік 2024 года расійскія вытворцы экспартавалі ў суседнюю дзяржаву мяса на 226 млн …

Чытаць