Грамадзянам выгадна рабіць доўгатэрміновыя ўклады ў беларускіх рублях — Нацбанк
23 ліпеня, Позірк. Грамадзянам выгадна размяшчаць доўгатэрміновыя ўклады ў беларускіх рублях, заявіў у праграме “Актуальнае інтэрв’ю” на тэлеканале “Беларусь 1” першы намеснік старшыні праўлення Нацыянальнага банка Аляксандр Ягораў.
У пацвярджэнне сваіх слоў ён звярнуў увагу, што максімальная працэнтная стаўка па такіх дэпазітах ад банкаў, што працуюць у краіне, — 15,64%, значна перавышае цяперашні ўзровень інфляцыі — 7,3%.
Ад пачатку 2025 года прырост доўгатэрміновых дэпазітаў у беларускіх рублях склаў каля 20%, або амаль 11 млрд беларускіх рублёў, што вышэй за чаканні праўлення Нацбанка, адзначыў прадстаўнік рэгулятара.
На доўгатэрміновыя ўклады прыпадае больш за 85% усіх размешчаных у цяперашні час дэпазітаў.
Пры гэтым, паводле яго слоў, з валютных дэпазітаў на ўклады ў беларускіх рублях у першым квартале 2025 года “перацякло” каля 70 млн рублёў.
Паводле сцвярджэння Ягорава, Нацбанк спрабуе стрымліваць рост спажывецкага крэдытавання ў дачыненні да тавараў небеларускай вытворчасці.
Разам з тым з яго слоў вынікае, што на айчынныя тавары выдаткавана толькі 1/8 частка крэдытаў на тавары доўгатэрміновага карыстання, выдадзеных банкамі ў першым паўгоддзі. “Прыкладна 250 мільёнаў — гэта крэдытны прадукт “Беларусбанка” “На родныя тавары”. І недзе каля 180 мільёнаў — гэта крэдыты, выдадзеныя на куплю аўтамабіляў Geely”, — удакладніў ён.
Агулам за першае паўгоддзе беларускія банкі выдалі крэдытаў на суму 96 млрд рублёў. З іх спажывецкіх — на 6 млрд, прычым прыкладна палову складаюць авердрафты (крэдытаванне банкам разліковага рахунку кліента-пазычальніка для аплаты разліковых дакументаў пры недастатковасці або адсутнасці на рахунку грашовых сродкаў).
У той жа час, сцвярджае Ягораў, для беларускіх грамадзян “нехарактэрна не плаціць за крэдыты”. Паводле яго слоў, пратэрмінаваная запазычанасць па крэдытах на куплю нерухомасці складае “тысячныя долі працэнта”, па спажывецкіх — 0,4% усіх выдадзеных банкамі крэдытаў.
21 ліпеня старэйшы навуковы супрацоўнік даследчага цэнтра BEROC Анатоль Харытончык заявіў на брыфінгу, што калі цэнавы кантроль не будзе пастрожаны, то гадавая інфляцыя восенню апынецца ў дыяпазоне 8–9%.
Як паведамляў “Позірк”, спажывецкія цэны ў чэрвені 2025 года выраслі на 0,9%, у параўнанні са снежнем 2024 года — на 5,4%, з чэрвенем 2024-га — на 7,3%.
Беларусь з паказчыкам 5,16% заняла сёмае месца паводле росту спажывецкіх цэн у 2024 годзе на тэрыторыі былога СССР, сведчыць праведзены “Позіркам” аналіз даных нацыянальных органаў статыстыкі.
МАРГ пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн: у студзені цэны не павінны былі вырасці больш, чым на 0,7% (па факце — +0,7%), па выніках студзеня — лютага — на 1,9% (2%), студзеня — сакавіка — на 2,2% (+2,8%), студзеня — красавіка — на 2,7% (+3,8%), студзеня — траўня — на 3% (+4,5%), студзеня — чэрвеня — 3,3%.
Далей: студзеня — ліпеня і студзеня — жніўня — 3,4%, студзеня — верасня — 3,7%, студзеня — кастрычніка — 4,1%, студзеня — лістапада — 4,4%, студзеня — снежня — 5%.
