У Мінску зноў падтапленні праз залеву, парушалася праца грамадскага транспарту
23 ліпеня, Позірк. У Мінску зноў падтапленне вуліц праз залеву, паведамляе прэс-служба Міністэрства па надзвычайных сітуацыях.
Зафіксавана 16 “асноўных участкаў падтапленняў праезных частак” — у Ленінскім, Савецкім, Кастрычніцкім, Цэнтральным, Партызанскім і Маскоўскім раёнах, а таксама шэсць выпадкаў спынення руху грамадскага транспарту. Былі арганізаваныя аб’язныя маршруты.
Дапамога супрацоўнікаў МНС спатрэбілася для адпампоўкі вады з тэрыторыі прыватнага домаўладання ў Кастрычніцкім раёне.
Паводле звестак УДАІ Мінгарвыканкама, рух транспарту ўскладнены ў шэрагу раёнаў сталіцы.
Згодна з данымі прадпрыемства “Мінсктранс”, больш за гадзіну з 8:00 у абодва бакі не хадзілі тралейбусы на вуліцах Гурскага і Глаголева; з 8:14 да 8:50 — на вуліцах Ільва Сапегі, Кнорына, Каліноўскага; з 8:29 да 9:25 — на вуліцы Казінца; з 8:37 да 9:08 — на Партызанскім праспекце ля “Мотавелазавода” ў бок плошчы Ванеева.
Праз падтапленне з 8:35 да 9:08 спыняўся рух па некалькіх аўтобусных маршрутах “на вуліцы Мірашнічэнкі, МКАД у абодвух напрамках”.
Паводле паведамленняў, апублікаваных фатаздымкаў і відэазапісаў у тэлеграм-каналах, вуліца Рэвалюцыйная, праспект Дзяржынскага і вуліцы ў раёне ст. м. Міхалова з раніцы сталі нагадваць рэкі. Наземны транспарт не функцыянаваў, людзі вымушаныя былі ісці пешкі да метро.
Белгідрамет абвясціў аранжавы ўзровень небяспекі ва ўсіх абласцях Беларусі, акрамя Гродзенскай і Брэсцкай.
Паводле прагнозаў сіноптыкаў, у Мінску тэмпература паветра ўдзень чакаецца ад 21 да 23 градусаў цяпла. Будзе воблачна з праясненнямі. Ранкам і ўдзень часам дождж, навальніца, пры ёй моцныя залевы і шквалісты вецер парывамі да 14 метраў на секунду.
16 ліпеня ў сталіцы было ліквідавана некалькі дзясяткаў падтапленняў. У Мінску з 13:20 да 18:00 было падтоплена 17 участкаў дарог, чатыры прыватныя жылыя дамы, падвалы шматкватэрнага жылога дома і трох адміністрацыйных будынкаў. Зафіксаваныя тры выпадкі падзення дрэў.
10 ліпеня У Мінску праз залеву зарэгістраваныя падтапленні ў Цэнтральным, Савецкім і Партызанскім раёнах. Таксама адбылося шэсць выпадкаў падзенняў дрэў у Заводскім, Цэнтральным і Маскоўскім раёнах.
5 чэрвеня рух грамадскага транспарту па 96 маршрутах (53 аўтобусных, 36 тралейбусных і 7 трамвайных) быў спынены праз залеву, што абрынулася на Мінск увечары.
