МЗС пацвердзіў гібель беларуса ў авіякатастрофе ў Амурскай вобласці РФ

25 ліпеня, Позірк. Міністэрства замежных спраў пацвердзіла гібель грамадзяніна Беларусі ў выніку авіякатастрофы ў Амурскай вобласці Расіі, пра гэта гаворыцца ў паведамленні прэс-службы знешнепалітычнага ведамства.

Адзначаецца, што генконсульства ва Уладзівастоку “падтрымлівае пастаянны кантакт з кампетэнтнымі органамі”.

“Дыпламаты знаходзяцца таксама на сувязі з сям’ёй беларускага грамадзяніна, аказваецца неабходная дапамога. Выказваем глыбокія спачуванні родным і блізкім загінулага”, — заявілі ў ведамстве.

Напярэдадні паведамлялася, што сярод пасажыраў пасажырскага самалёта Ан-24, які разбіўся 24 ліпеня ў Амурскай вобласці, быў грамадзянін Беларусі Дзяніс Казенка. На борце самалёта, які накіроўваўся па маршруце Хабараўск — Благавешчанск — Тында, было 43 пасажыры і шэсць членаў экіпажа, ніхто з іх не выжыў.

Паведамлялася, што Казенка быў супрацоўнікам беларускай кампаніі “Інаватэк”, якая займаецца інавацыйнымі тэхналогіямі ў сферы лясной гаспадаркі, і знаходзіўся ў Хабараўску ў камандзіроўцы.

У Мінску ў яго засталіся жонка і 10-месячная дачка.

Самалёт Ан-24 заходзіў на другі круг для пасадкі, але затым рэзка знік з радараў. Пазней яго абломкі знайшоў верталёт Расавіяцыі.

Аляксандр Лукашэнка накіраваў спачуванні Уладзіміру Пуціну ў сувязі з катастрофай.