Польшча ўвяла санкцыі супраць Беларускай цэментнай кампаніі
25 ліпеня, Позірк. Варшава ўвяла санкцыі ў дачыненні да кіруючай кампаніі холдынгу “Беларуская цэментная кампанія” (БЦК), вынікае з абноўленага спісу на сайце Міністэрства ўнутраных спраў і адміністрацыі Польшчы (МУСіА).
БЦК унесеная ў спіс 22 ліпеня.
Прадпрыемства, як вынікае з дакумента, “дэманструе значны рост у сваёй дзейнасці, у тым ліку дзякуючы пашырэнню і ўмацаванню супрацоўніцтва з Расійскай Федэрацыяй”.
Холдынг “Беларуская цэментная кампанія” з’яўляўся буйным пастаўшчыком цэменту ў Польшчу, у 2022 годзе ажыццявіў пастаўкі на 160 млн злотых (каля 44,4 млн долараў па бягучым курсе).
Акрамя цэменту, кампанія экспартавала ў Польшчу негашаную і гашаную вапну, а таксама сценавыя блокі. Тавары закупляла некалькі юрыдычных асоб, у тым ліку даччынае прадпрыемства БЦК, размешчанае ў Варшаве.
МУСіА паведамляе, што сярод контрагентаў холдынгу застаюцца дзве кампаніі, якія з 2022 года закупляюць тавары (гашаная і негашаная вапна), якія не падпадаюць пад забарону на імпарт з Беларусі.
У дакуменце адзначаецца, што санкцыі супраць БЦК уведзеныя праз тое, што холдынг “цесна супрацоўнічае і ўвесь час развівае супрацоўніцтва з суб’ектамі Расійскай Федэрацыі, пастаўляючы прадукцыю, якая істотна спрыяе паляпшэнню функцыянавання абаронна-арыентаванай эканомікі”. Гэта прыводзіць “да нарошчвання яе вайсковага патэнцыялу ў мэтах працягу агрэсіі супраць Украіны”.
Санкцыі прадугледжваюць замарожванне сродкаў кампаніі на тэрыторыі Польшчы, забарону на прадастаўленне любых грашовых сродкаў або эканамічных рэсурсаў, выключэнне з працэдуры дзяржаўных закупак або конкурсаў.
9 ліпеня стала вядома, што Польшча ўвяла санкцыі ў дачыненні да беларускага бізнесмена Аляксандра Машэнскага.
Некалькімі днямі пазней зарэгістраваная ў Казахстане кампанія QARTREE LLP, за якой стаіць Беларусь, была таксама ўнесеная ў санкцыйны спіс Міністэрства ўнутраных спраў і адміністрацыі Польшчы за экспарт расійскай і беларускай фанеры.
5 снежня 2023 года БЦК была ўключаная ў санкцыйны спіс ЗША.
