Амбасадар Канады ў Польшчы запэўніла Латушку ў далейшай падтрымцы дэмсіл

3 жніўня, Позірк. Падтрымка беларускіх дэмакратычных сіл з боку Канады будзе працягвацца, заявіла амбасадар гэтай паўночнаамерыканскай краіны ў Польшчы Кэтрын Годзін на сустрэчы з намеснікам кіраўніка Аб’яднанага пераходнага кабінета (АПК), кіраўніком Народнага антыкрызіснага ўпраўлення (НАУ) Паўлам Латушкам і спікерам Каардынацыйнай рады, намеснікам кіраўніка НАУ Арцёмам Бруханам.

Як паведаміў Латушка 3 жніўня ў сваім тэлеграм-канале, на сустрэчы абмяркоўвалася пашырэнне ўзаемадзеяння дэмсіл з Атавай “у рамках АБСЕ, уключаючы місію Канады пры АБСЕ ў Вене”, бакі “пагадзіліся арганізаваць” адпаведныя працоўныя сустрэчы.

Таксама ўздымалася тэма “правядзення прававых кансультацый у бліжэйшы час з Міністэрствам замежных спраў Канады”, адзначыў палітык.

Паводле слоў Латушкі, канадскі бок “быў праінфармаваны аб працы па зборы доказаў у рамках расследавання, якое вядзе офіс пракурора Міжнароднага крымінальнага суда, па злачынствах супраць чалавечнасці, учыненых Лукашэнкам і яго саюзнікамі ў дачыненні да беларускага народа”.

“Амбасадарцы Канады былі перададзеныя прапановы аб увядзенні нацыянальных санкцый Канады ў дачыненні да прадстаўнікоў рэжыму Лукашэнкі — прапагандыстаў, суддзяў і шэрагу прадпрыемстваў ВПК, якія падтрымліваюць расійскую агрэсію. Амбасадарка Канады адзначыла, што матэрыялы аператыўна будуць накіраваныя ў МЗС Канады для прапрацоўкі”, — падкрэсліў Латушка.

У паведамленні гаворыцца, што Брухан праінфармаваў Годзін аб падрыхтоўцы да канферэнцыі “Новая Беларусь”. Дыпламат, як адзначаецца, “пацвердзіла ўдзел прадстаўніка Канады ў мерапрыемствах канферэнцыі ў якасці запрошанага госця”.

IV канферэнцыя “Новая Беларусь” пройдзе 9–10 жніўня ў Варшаве.

Атава паслядоўна крытыкуе рэжым Лукашэнкі. Разам з партнёрамі яна не аднойчы сінхранізавала санкцыі супраць афіцыйнага Мінска. Канада падтрымлівае дэмакратычныя памкненні беларускага народа. У лістападзе мінулага года адбыўся першы раўнд кансультацый канадскага ўрада і дэмакратычных сіл Беларусі.