Мінабароны адчыталася аб прыбыцці першага эшалона з РФ для ўдзелу ў вучэннях “Захад-2025” (дапоўнена)

6 жніўня, Позірк. У Беларусь прыбыў першы эшалон з вайскоўцамі РФ і тэхнікай “для падрыхтоўкі і далейшага ўдзелу ў сумесным стратэгічным вучэнні ўзброеных сіл Беларусі і Расіі “Захад-2025”, паведаміла 6 жніўня беларускае Міністэрства абароны (цытата дадзена ў арыгінале).

Сцвярджаецца, што вучэнні з’яўляюцца “асноўным этапам сумеснай падрыхтоўкі армій дзвюх дзяржаў у бягучым годзе” — у верасні.

“Цяпер беларускія і расійскія ваеннаслужачыя знаходзяцца на завяршальным этапе падрыхтоўкі”, — сказана ў рэлізе.

Паводле намесніка камандуючага войскамі Паўночна-Заходняга аператыўнага камандавання Паўла Шабекі, тых, хто прыбыў, сустрэлі “ва ўрачыстай абстаноўцы”.

“Падчас вучэнняў мы плануем адпрацаваць новыя формы і спосабы прымянення падраздзяленняў воінскіх часцей сухапутных войскаў на аснове аналізу апошніх сучасных ваенных канфліктаў”, — цытуе яго прэс-служба Мінабароны.

Таксама ў рэлізе прыводзяцца словы неназванага “вайскоўца Узброеных сіл РФ” аб тым, што “ваенны саюз Расіі і Беларусі з’яўляецца неад’емнай умовай для далейшага развіцця” дзяржаў: “Гэта мае важнае значэнне пры бягучых пагрозах. З пачаткам СВА гэта ўвайшло ў разрад першачарговых задач”.

Асаблівасцю сёлетніх вучэнняў названа манеўранасць разгортвання войскаў.

Сумесныя з Расіяй вучэнні “Захад” праходзяць раз на два гады напераменку на тэрыторыі Беларусі і РФ.

Міністр абароны Віктар Хрэнін заявіў 28 траўня аб “зніжэнні параметраў” вучэнняў гэтага года і пераносе манеўраў ад межаў углыб Беларусі (1 ліпеня Аляксандр Лукашэнка заявіў, што вучэнні перанесены, каб “знізіць градус напружанасці ў рэгіёне”).

Месяцам пазней, 23 чэрвеня, начальнік Генеральнага штаба Узброеных сіл Павел Муравейка паведаміў, што “напалову зменшаны склад войскаў, якія бяруць удзел у вучэннях”, аднак Мінск можа перамясціць “асобныя падраздзяленні” да заходніх граніц, каб “адпрацаваць эпізоды выключна абарончага характару”.

Тэрмінам “спецыяльная ваенная аперацыя (СВА)” расійскія і беларускія ўлады называюць поўнамаштабную вайну, развязаную Масквой супраць Украіны 24 лютага 2024 года. Тэрыторыя Беларусі выкарыстоўвалася ў яе пачатку для ўварвання. Войскі, якія прыбылі для ўдзелу ў вучэннях “Саюзная рашучасць” (102–0 лютага 2022 года) не былі выведзены і ўвайшлі на ўкраінскую тэрыторыю.