Мінск 23:05

Латушка пра абвінавачанні ў фільме АНТ: Сілавікі не выканалі свае абавязкі, трэба пазрываць з іх генеральскія пагоны

Апублікавана на адкрытай версіі “Позірку” 8 жніўня 2025 года ў 12:59

Ілюстрацыйнае фота: тэлеграм-канал АПК

7 жніўня, Позірк. У прапагандысцкага фільма, паказанага 6 жніўня на тэлеканале АНТ, быў адзіны глядач — Аляксандр Лукашэнка, такое меркаванне выказаў “Позірку” намеснік кіраўніцы Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.

“Я думаю, што ён павінен быць задаволены, бо ён сам прыдумаў гэтую гісторыю, сам даў загад змантававаць гэтую стужку і сам, я думаю, задаволены глядзеў, — сказаў суразмоўца. — І гэта спектакль для аднаго гледача, але як былы дырэктар Купалаўскага [тэатра] я стаўлю яму нуль”.

Паводле слоў палітыка, згаданыя ў фільме высокапастаўленыя сілавікі, калі кіравацца логікай гэтага матэрыялу, “не выканалі свае службовыя абавязкі”: “Яны чамусьці не затрымалі мяне і групу асоб, якая нібы рыхтавала [у жніўні 2020 года] спаленне лідараў беларускай апазіцыі. І да гэтага часу яны не ўзбудзілі крымінальную справу ў дачыненні да мяне і гэтых асоб, якіх яны згадваюць”.

У сувязі з гэтым Латушка параіў Лукашэнку “пазрываць генеральскія пагоны” з кіраўніка апарата Савета міністраў Валерыя Вакульчыка (на момант падзей, пра якія ідзе гаворка ў фільме, займаў пасаду старшыні Камітэта дзяржбяспекі), намесніка міністра ўнутраных спраў — камандуючага ўнутранымі войскамі Мікалая Карпянкова (тады — начальнік ГУБАЗіК) і першага намесніка кіраўніка МУС Генадзя Казакевіча (тады — проста намеснік міністра).

Палітык назваў фільм “легендаваннем”, якое “робіцца на асабісты загад Лукашэнкі”. “Ён 1 ліпеня агучыў публічна гэтую хлусню на сваім Дні незалежнасці, што нібыта планавалася такая акцыя — спаленне лідараў апазіцыі, і КДБ гэта ўзяло да выканання, — заявіў Латушка. — І зараз мы бачым рэалізацыю інфармацыйна-прапагандысцкай сілавой спецаперацыі КДБ у дачыненні да мяне і ў дачыненні да Святланы Ціханоўскай”.

“Я думаю, што яна (спецаперацыя. — Позірк“.) — частка больш агульнай спецаперацыі пры каардынацыі ўсіх спецслужбаў Беларусі, не толькі КДБ. Гэта і вайсковая выведка Міністэрства абароны і выведка Міністэрства ўнутраных справаў”, — дадаў ён.

Паводле слоў намесніка кіраўніцы АПК, сілавікі актывізавалі спробы вярбоўкі актывістаў, прадстаўнікоў структур дэмсіл, у тым ліку НАУ.

“Лукашэнка хоча знішчыць альтэрнатыву, — упэўнены ён. — Можам па-рознаму ацэньваць нашую сілу, але сам факт існавання дэмакратычных інстытутаў як альтэрнатывы — гэта як костка ў горле для Лукашэнкі. На жаль, я маю яшчэ больш шырокую інфармацыю, але падзяліцца не маю права”.

Адразу пасля паказу на АНТ згаданага фільма, “фактычна праз некалькі хвілін”, Латушка, паводле яго сцвярджэння, атрымаў электронны ліст з пагрозамі. Яшчэ адзін такі ліст прыйшоў а пятай гадзіне раніцы 7 жніўня — “ад тых жа адрасатаў, што і перад атакай у Варшаўскім універсітэце”. На думку палітыка, гэта сведчыць, што за такімі дзеяннямі стаяць адныя і тыя ж людзі.

“У гэтых емэйлах — учора і сёння — утрымліваюцца пагрозы нанясення фізічнай шкоды і нават пазбаўлення жыцця”, — заявіў ён. Латушка падкрэсліў, што “гэта не жарт”, і ацэньвае пагрозы сур’ёзна.

“Да гэтага часу ідзе ў Нацыянальнай пракуратуры Польшчы расследаванне, якое ажыццяўляе Агенцтва ўнутранай бяспекі, па падбухторванні высветленай асобы да майго забойства. Гэта было ініцыявана менавіта польскай дзяржавай, гэта не была мая заява. Ідзе расследаванне па факту знікнення [экс-спікера Каардынацыйнай рады] Анжалікі Мельнікавай. Мы ўжо фактычна чатыры з паловай месяцы не бачылі яе. Ідзе таксама шэраг расследаванняў па іншых пагрозах у мой бок — такіх, як пазбаўленне жыцця, акты фізічнай шкоды. Таксама мы ведаем, меў месца акт нападу ў Варшаўскім універсітэце”, — дадаў палітык.

Пра факты атрымання новых пагроз Латушка праінфармаваў міністра — каардынатара спецслужб і пракуратуру Польшчы. “Я знаходжуся ў Еўрапейскім саюзе, у Польшчы. Я разлічваю на тое, што мая бяспека як асобы, якая мае міжнародную абарону, будзе гарантаваная”, — выказаў ён спадзеў.

Латушка канстатаваў, што сітуацыя ёсць “вялізным выклікам” для спецслужб Польшчы, Літвы ды іншых еўрапейскіх краін — з улікам таго, што “дыктатары паставілі мэтанакіраваную задачу ажыццяўляць дыверсіі, пагрозы, напады, іншага незаконнага характару дзеянні ў дачыненні да гэтых краін, грамадзян гэтых краін, у тым ліку ў дачыненні да беларусаў і дэмакратычных сіл Беларусі”.

Падзяліцца: