У сістэме сярэдняй адукацыі Беларусі задзейнічана каля 2 тыс. “кіраўнікоў па ваенна-патрыятычным выхаванні”

Апублікавана на адкрытай версіі “Позірку” 17 жніўня 2025 года ў 17:30

17 жніўня, Позірк. Каля 2 тыс. “кіраўнікоў па ваенна-патрыятычным выхаванні” задзейнічана ў сістэме сярэдняй адукацыі Беларусі, вынікае з інфармацыі, размешчанай у метадычках для членаў інфармацыйна-прапагандысцкіх груп да чарговага “адзінага дня інфармавання”.

Штомесячнае ідэалагічнае мерапрыемства пройдзе 21 жніўня пад дэвізам “Адукацыя і навука — рухаючыя сілы развіцця грамадства і дзяржавы”.

Матэрыялы традыцыйна падрыхтаваны НДІ тэорыі і практыкі дзяржаўнага кіравання Акадэміі кіравання пры прэзідэнце для працы ідэолагаў, прапагандыстаў і чыноўнікаў з трыма мэтавымі групамі — інтэлігенцыяй, моладдзю і рабочымі.

Ва ўстановах агульнай сярэдняй адукацыі (УАСА) на пасадзе кіраўніка па ваенна-патрыятычным выхаванні працуе 1.730 чалавек, у каледжах — 168 (паводле даных Міністэрства адукацыі, у краіне 2.848 УАСА і 226 каледжаў. — “Позірк”.). Акрамя таго, функцыянуе больш за 250 ваенна-патрыятычных клубаў і каля 900 пошукавых аб’яднанняў.

У метадычках для моладзі кіраўнікі па ваенна-патрыятычным выхаванні названыя спецыялістамі, а ў матэрыялах для інтэлігенцыі гэтая статыстыка не прыводзіцца наогул.

Згодна з інструктыўна-метадычным лістом “Аб арганізацыі работы кіраўніка па ваенна-патрыятычным выхаванні ва ўстановах агульнай сярэдняй адукацыі” (размешчаны на сайце Акадэміі адукацыі), ваенна-патрыятычнае выхаванне ва УАСА “забяспечваецца сістэмай мэтанакіраваных мерапрыемстваў светапогляднага, ідэалагічнага, прававога, палітычнага, інфармацыйнага і арганізацыйнага характару”.

У “рэалізацыю задач ваенна-патрыятычнага выхавання навучэнцаў” ва УАСА “павінны быць уключаныя ўсе суб’екты адукацыйнага працэсу”. Кіраўнік па ваенна-патрыятычным выхаванні названы “цэнтральнай фігурай сістэмы ваенна-патрыятычнага выхавання ва УАСА”.

Сярод “умоў эфектыўнага ваенна-патрыятычнага выхавання” — “прапаганда ваенных, ваенна-спартыўных і ваенна-прамысловых дасягненняў беларускай дзяржавы”; “падтрымка дзейнасці дзіцячых і маладзёжных грамадскіх аб’яднанняў ваенна-патрыятычнай накіраванасці (ГА “БРПА”, ГА “БРСМ” і інш.)” (піянерская і маладзёжная арганізацыі адпаведна. — “Позірк”.); “узаемадзеянне з <…> рэсурснымі цэнтрамі па ваенна-патрыятычным выхаванні, воінскімі фарміраваннямі, ваеннымі ўстановамі адукацыі”.

У пераліку “крытэрыяў і паказчыкаў ацэнкі работы кіраўнікоў па ваенна-патрыятычным выхаванні” — “працэнт ўцягнутасці вучняў у засваенне зместу факультатыўных заняткаў ваенна-патрыятычнай накіраванасці”; “колькасць навучэнцаў, якія бяруць удзел у рабоце органаў вучнёўскага самакіравання, БРСМ і іншых моладзевых аб’яднаннях”; “колькасць выпускнікоў, якія паступілі ва ўстановы адукацыі дзяржаўных органаў сістэмы забеспячэння нацыянальнай бяспекі”; “колькасць выяўленых выпадкаў дэструктыўнага інфармацыйнага ўздзеяння на ўдзельнікаў адукацыйнага працэсу”.