Украіна ўключыла Мінскі завод шасцерняў і Мінскі прыборабудаўнічы інстытут у санкцыйны пакет супраць вытворцаў і пастаўшчыкоў дронаў
17 жніўня, Позірк. Мінскі завод шасцерняў і Мінскі навукова-даследчы прыборабудаўнічы інстытут (МНДПІ) уключаныя ў санкцыйны пакет, які Украіна ўвяла на 10 гадоў супраць вытворцаў і пастаўшчыкоў дронаў, што выпускаюцца з выкарыстаннем штучнага інтэлекту.
Рашэнне аб новых санкцыях супраць расійскага ваенна-прамысловага комплекса і яго партнёраў прыняў 16 жніўня Савет нацыянальнай бяспекі і абароны Украіны, яно ўведзена ў дзеянне ўказам Уладзіміра Зяленскага. У паведамленні прэс-службы прэзідэнта гаворыцца, што беларускія прадпрыемствы пастаўляюць расійскім электроніку.
Агулам абмежаванні закранулі 39 фізічных асоб і 55 кампаній (43 расійскіх, 10 кітайскіх, 2 беларускія), адзначаецца ў рэлізе.
Санкцыі прадугледжваюць 16 відаў абмежаванняў, у тым ліку блакаванне актываў, гандлёвых аперацый, забарону на ўдзел у закупках, прыватызацыі, арэнду маёмасці на тэрыторыі Украіны, скасаванне візітаў, пасяджэнняў, перамоваў па пытаннях складання дагавораў і пагадненняў.
“Украіна працуе з партнёрамі, каб рэалізаваць сінхранізацыю гэтых санкцый у сусветных юрысдыкцыях“, — гаворыцца ў паведамленні прэс-службы прэзідэнта.
20 чэрвеня 2025 года Украіна ўвяла санкцыі супраць завода дакладнай электрамеханікі, размешчанага ў Дзяржынскім раёне Мінскай вобласці. Прадпрыемства спецыялізуецца на таварах падвойнага прызначэння, рамантуе узбраенні і іншую ваенную тэхніку, займаецца навуковымі распрацоўкамі ВПК. 27 сакавіка 2025 года санкцыі супраць завода ўвёў Еўрасаюз.
