На фоне паляпшэння адносін з ЗША Лукашэнка зноў асудзіў чэрвеньскія ўдары па ядзернай інфраструктуры Ірана

20 жніўня, Позірк. Беларусь падтрымлівае “легітымнае права Ірана на развіццё мірнага атама”, заявіў Аляксандр Лукашэнка 20 жніўня на сустрэчы ў Мінску з іранскім прэзідэнтам Масудам Пезешкіянам.

Прэс-служба Лукашэнкі паведамляе, што ён згадаў “напружаную сітуацыю пасля новага вітка вайсковай эскалацыі паміж Ізраілем і Іранам, што прывяло да прамога ўключэння ў канфлікт ЗША”.

“Сілавое супрацьстаянне — сур’ёзная пагроза рэгіянальнай і міжнароднай стабільнасці і бяспекі, асабліва ў сувязі з нанясеннем удараў па інфраструктуры Ірана, у тым ліку ядзернай, якая знаходзіцца пад кантролем МАГАТЭ. Упэўнены, для дасягнення трывалага міру важна ўстрымлівацца ад любых дзеянняў, якія могуць справакаваць новую эскалацыю. Мудрасць, дальнабачнасць павінны ўзяць верх над эмоцыямі і прадузятасцямі”, — сказаў ён.

27 чэрвеня ў Мінску на пасяджэнні Вышэйшага Еўразійскага эканамічнага савета Лукашэнка раскрытыкаваў удары па ядзернай інфраструктуры Ірана.

“Нядаўнія ўдары па ядзерных аб’ектах Ірана, якія знаходзяцца пад кантролем МАГАТЭ, самым небяспечным чынам парушаюць палажэнні міжнароднага права, уключаючы дагавор аб нераспаўсюджванні ядзернай зброі і Жэнеўскія канвенцыі 1949 года”, — заявіў ён.

Лукашэнка наўпрост не назваў краіны, якія нанеслі ўдары па Іране, аднак у чэрвені гэта зрабілі Ізраіль і ЗША.

13 чэрвеня 2025 года Міністэрства замежных спраў Беларусі выказала “глыбокую занепакоенасць” у сувязі з “новым вітком ваеннай эскалацыі паміж Ізраілем і Іранам і паведамленнямі аб гібелі мірных грамадзян, уключаючы дзяцей” і заклікала “ўсе ўцягнутыя бакі да стрыманасці, адказнасці і недапушчэння дзеянняў, якія могуць негатыўна паўплываць на палітыка-дыпламатычныя намаганні міжнароднай супольнасці, накіраваныя на комплекснае ўрэгуляванне сітуацыі на Блізкім Усходзе”.

У рамках двухбаковых адносін рэжым Лукашэнкі спрабуе супрацоўнічаць як з Іранам, так і з Ізраілем, апошнім часам палепшыліся адносіны Мінска з ЗША.

Візіт прэзідэнта Ірана ў Беларусь праходзіць на фоне ўсё больш частых адкрытых кантактаў Аляксандра Лукашэнкі з уладамі Злучаных Штатаў Амерыкі і адначасова напружанасці паміж ЗША і Іранам.

12 лютага 2025 года ў выніку непублічных перамоў у Мінску намесніка памочніка дзяржсакратара ЗША Крыстафера Сміта і прадстаўнікоў беларускіх уладаў былі вызваленыя і адпраўленыя ў Літву палітвязні Андрэй Кузнечык (супрацоўнік “Радыё Свабода”), Алена Маўшук, а таксама асуджаны ў рамках палітычна матываванай справы амерыканскі і ўкраінскі грамадзянін Мікалай Шугаеў.

21 чэрвеня ў беларускай сталіцы адбыліся перамовы Лукашэнкі і спецпрадстаўніка прэзідэнта ЗША па пытаннях Украіны Кіта Келага. Неўзабаве пасля гэтага на волю адпусцілі і дэ-факта выслалі з краіны 14 чалавек (паводле іншых звестак 16), пераважна палітвязняў, у тым ліку відэаблогера Сяргея Ціханоўскага — мужа дэмакратычнага лідара Святланы Ціханоўскай.

15 жніўня — перад сустрэчай з прэзідэнтам Расіі Уладзімірам Пуціным на Алясцы — прэзідэнт ЗША Дональд Трамп пагаварыў па тэлефоне з Лукашэнкам. На сваёй старонцы ў сацыяльнай сетцы TruthSocial амерыканскі палітык назваў “выдатнай” гутарку з “глыбокапаважаным прэзідэнтам Беларусі”.

Паводле слоў Трампа, ён пагаварыў з Лукашэнкам у тым ліку для таго, каб выказаць “падзяку за вызваленне 16 зняволеных”: “Мы таксама абмяркоўваем вызваленне яшчэ 1.300 зняволеных. Наша гутарка была вельмі плённай. Мы абмеркавалі мноства тэм, уключаючы візіт прэзідэнта Пуціна на Аляску”.

Пазней Лукашэнку патэлефанаваў намеснік спецпасланніка прэзідэнта ЗША па Украіне Кіта Келага Джон Коўл.

Сітуацыя на Блізкім Усходзе абвастрылася 13 чэрвеня, калі розныя цэлі на тэрыторыі Ірана пачала атакаваць Армія абароны Ізраіля. У асноўным удары наносіліся па ваенных і ядзерных аб’ектах, атакавана больш за 1.000 цэляў. У выніку серыі кропкавых удараў было ліквідавана вышэйшае камандаванне Корпуса вартавых ісламскай рэвалюцыі, іранскай арміі і выведкі, забіта дзевяць навукоўцаў-ядзершчыкаў. Паводле даных Міністэрства аховы здароўя Ірана, усяго ў краіне загінулі не менш за 627 чалавек, яшчэ 4.870 атрымалі раненні і траўмы.

Мэтай ізраільскай ваеннай аперацыі названа нанясенне крытычнага ўрону ядзернаму і ракетнаму патэнцыялу Ірана.

Іран адказаў масіраванымі ўдарамі з ужываннем балістычных ракет і беспілотных лятальных апаратаў. Некаторыя ракеты ўпалі ў жылых раёнах у Тэль-Авіве, Рамат-Гане, Рышон-ле-Цыёне, Бат-Яме, Тамрэ, Хайфе, Петах-Тыкве, Беэр-Шэве і іншых населеных пунктах Ізраіля. Вядома, што загінула не менш за 28 чалавек, пацярпела амаль 1.500.

22 чэрвеня амерыканскія бамбавікі B-2 нанеслі ўдары па іранскім ядзерным аб’екце ў Форда, выкарыстаўшы шэсць процібункерных бомбаў.

Па іранскіх ядзерных аб’ектах у Натанзе і Ісфахане было запушчана 30 ракет “Тамагаўк” з падводных лодак.

У адказ Іран атакаваў вайсковыя базы ЗША ў Катары, Кувейце, Бахрэйне і ААЭ. Паводле звестак амерыканскага боку, базы ад іранскіх удараў не пацярпелі, ахвяр няма.

24 чэрвеня Трамп абвясціў аб перамір’і паміж Ізраілем і Іранам. У Ізраілі мінулыя падзеі называюць “дванаццацідзённай вайной”.