Чарга на выезд з Беларусі ў Польшчу працягвае скарачацца

29 жніўня, Позірк. Уезду ў Еўрасаюз на 10:00 29 жніўня чакала 4.655 легкавых аўтамабіляў, вынікае з аператыўных звестак Дзяржаўнага памежнага камітэта.

Суткі таму на 10:00 колькасць аўтамабіляў, якія чакалі выезду з Беларусі, складала 4.800.

Зніжэнне пераважна адбылося за кошт скарачэння чаргі на мяжы з Польшчай: на паказаны час 28 жніўня ў пункце пропуску Брэст (з сумежнага боку Цярэспаль) было 4.150 аўтамабіляў, на раніцу 29-га — 4.015.

Знізілася таксама колькасць аўто на мяжы з Літвой: у пункце Каменны Лог (Мядзінінкай) — з 330 да 310 аўтамабіляў; нязначна вырасла (з 270 да 280) у Беняконях (Шальчынінкай).

На мяжы з Латвіяй у пункце пропуску Грыгароўшчына (Патэрніекі) на 10 гадзін 29 жніўня было 50 аўтамабіляў (суткамі раней столькі ж).

На 10 гадзін у пункце пропуску Брэст уезду ў Польшчу чакала 15 аўтобусаў (суткамі раней — 7). Чэргаў аўтобусаў на мяжы з краінамі Балтыі на ўказаны час не было.

Пункт пропуску Брэст на мяжы з Польшчай застаецца самым загружаным маршрутам для легкавога транспарту. Больш за ўсё аўтамабіляў — 4.770 — сабралася тут у 2 гадзіны ночы 20 жніўня, рэкорд у чарзе аўтобусаў быў зафіксаваны ў 12 гадзін 19 жніўня — 157.

Перад памежнымі пераходамі Беняконі і Каменны Лог фіксуецца 570 (610 суткамі раней) грузавікоў, чаргі на ўездзе ў Польшчу на кантрольным пункце Казловічы (Кукурыкі) на 10 раніцы 29 жніўня не было (суткамі раней уезду чакала 10 фур).

Раней Дзяржпагранкамітэт заяўляў, што “закладнікамі сітуацыі, якая стала вынікам дзеянняў польскіх службаў, аказаліся звычайныя турысты, сярод якіх шмат грамадзян з краін Еўрасаюза”.

Польскія памежнікі тлумачылі павольнае праходжанне мяжы неабходнасцю больш дакладнай праверкі.

Брэст — адзіны даступны для падарожнікаў аўтамабільны пункт пропуску на мяжы Беларусі і Польшчы.

Пасля вынясення палітычна матываванага прысуду журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла другі аўтамабільны пункт — Баброўнікі (з беларускага боку Бераставіца).

8 жніўня 2023 года Літва закрыла пункты пропуску Шумскас (Лоша) і Твярячус (Відзы), 1 сакавіка 2024-га — Лаварышкес (Катлоўка) і Райгардас (Прывалка). На мяжы з Беларуссю працягваюць працаваць два пагранпераходы — Мядзінінкай (Каменны Лог) і Шальчынінкай (Беняконі).

19 верасня 2023 года з-за ўзрослай плыні нелегальных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).