Удзельнікі вучэнняў АДКБ адпрацуюць на тэрыторыі Беларусі супрацьдзеянне знешняй агрэсіі і ДРГ — Муравейка

31 жніўня, Позірк. Пра пачатак сумесных вучэнняў з калектыўнымі сіламі аператыўнага рэагавання (КСАР) Арганізацыі Дагавора аб калектыўнай бяспецы (АДКБ) паведаміла 31 жніўня Міністэрства абароны.

Паводле слоў начальніка Генеральнага штаба Узброеных сіл — першага намесніка міністра абароны Паўла Муравейкі, АДКБ сёння з’яўляецца, “мабыць, адзінай ваенна-палітычнай структурай, якая абараняе інтарэсы дзяржаў — членаў арганізацыі на постсавецкай прасторы”.

“Сёння ваенна-палітычнае становішча, якое складваецца ў свеце, такое, што яго нельга назваць спакойным, і нам неабходна ў гэтых умовах трымаць порах сухім. Менавіта таму мы ўдзяляем вялікую ўвагу падрыхтоўцы органаў кіравання і штабоў, войскаў, сістэмы калектыўнай бяспекі”, — заявіў чыноўнік.

Муравейка адзначыў, што “ўсе задачы, якія спланаваныя і намечаныя, будуць адпрацаваныя з высокай якасцю”.

“У рамках вучэнняў плануецца адпрацаваць цэлы комплекс пытанняў па забеспячэнні грамадскай бяспекі, стварэнні ўмоў для процідзеяння знешняй агрэсіі, барацьбе з незаконнымі ўзброенымі фарміраваннямі і дыверсійна-разведвальнымі групамі (ДРГ) праціўніка”, — дадаў кіраўнік Генштаба.

Пры гэтым, паводле яго сцвярджэння, “плануецца ўжываць самыя сучасныя прыёмы і спосабы дзеянняў”, якія выкарыстоўваліся ў “апошніх ваенных канфліктах”.

“Мы разглядаем пытанні прымянення беспілотных авіяцыйных комплексаў, рабатызаваных сістэм, пытанні радыёэлектроннай барацьбы, абароны і разгортвання сродкаў сувязі і камунікацыі з выкарыстаннем апошніх дасягненняў IT-сістэм і гэтак далей. Гэтыя пытанні адпрацоўваюцца ў рамках арганізацыі. Мы з нашымі калегамі па АДКБ абменьваемся апошнімі дасягненнямі”, — сказаў Муравейка.

Ён пацвердзіў удзел у вучэннях “значных кантынгентаў” Расіі, Казахстана, Кыргызстана і Таджыкістана і назваў беларускі кантынгент “самым шматлікім”, прадстаўленым “лепшым злучэннем” — 103-й Віцебскай асобнай гвардзейскай паветрана-дэсантнай брыгадай.

“Для таго каб разгарнуць і паказаць тыя дасягненні, якія ёсць у нас, мы заклікалі ваеннаабавязаных з запасу Узброеных сіл Рэспублікі Беларусь”, — паведаміў кіраўнік Генштаба.

“Мы загадзя заявілі пра тое, што праводзім такія вучэнні, загадзя пазначылі тое месца, дзе мы іх праводзім. Мы не ўтойваем сцэнарыі зместу і запрашаем усіх наведаць і паглядзець эпізоды, якія будуць адпрацоўвацца на гэтых вучэннях”, — заявіў чыноўнік.

Паводле яго слоў, цяжкасцяў у камунікацыі паміж удзельнікамі вучэнняў няма: “Нам вельмі проста і вельмі лёгка рэалізоўваць гэтыя падыходы. Мы гаворым на адной мове. Мы заканчвалі агульныя школы, у нас адзіны погляд на ацэнку ваенна-палітычнага становішча, на вядзенне дзеянняў. У нас адзіная зброя. Можа быць, у кагосьці яна трохі больш новая, у кагосьці трохі больш старая, але яна выкавана на адзіных заводах, і мы ведаем, як <…> яе ўжываць”.

Раней паведамлялася, што вучэнні КСАР АДКБ “Узаемадзеянне-2025”, “Пошук-2025” і “Эшалон-2025” пройдуць на палігонах “Ласвіда” і “Лепельскі” (абодва — Віцебская вобласць) з 31 жніўня па 6 верасня.

Вучэнні “Узаемадзеянне-2025”, як заяўляецца, “нацэленыя на адпрацоўку пытанняў падрыхтоўкі і правядзення сумеснай аперацыі па ўдзеле ў вырашэнні крызіснай сітуацыі на тэрыторыі дзяржавы — члена АДКБ”.

У рамках вучэнняў “Пошук-2025” будуць “адпрацоўвацца пытанні арганізацыі і вядзення выведкі ў інтарэсах КСАР АДКБ”, вучэнні “Эшалон-2025” прадугледжваюць “адпрацоўку пытанняў арганізацыі матэрыяльна-тэхнічнага забеспячэння”.

“Асаблівасцю гэтых вучэнняў у 2025 годзе з’яўляецца тое, што задумы іх правядзення цесна ўвязаныя з задумай сумеснага стратэгічнага вучэння ўзброеных сіл Рэспублікі Беларусь і Расійскай Федэрацыі “Захад-2025”, — заявілі ў арганізацыі.

Начальнік аб’яднанага штаба АДКБ Андрэй Сердзюкоў, выступаючы 25 жніўня на брыфінгу, “асабліва падкрэсліў, што вучэнні, якія праводзяцца ў фармаце АДКБ, з’яўляюцца планавымі, не накіраваныя супраць трэціх краін і маюць на мэце ўдасканаленне зладжанасці органаў кіравання і войскаў, а таксама падтрыманне гатоўнасці фарміраванняў сіл і сродкаў да выканання задач па прызначэнні ў інтарэсах забеспячэння калектыўнай бяспекі”.

12–16 верасня пройдуць маштабныя беларуска-расійскія вучэнні “Захад-2025“. Паведамлялася, што падчас вучэнняў будуць адпрацаваныя “планаванне прымянення” ядзернай зброі і комплексу “Арэшнік“, а таксама супрацьпаветраная абарона, абарончыя баявыя дзеянні, падтрымка тактычнай авіяцыі і інш.

Паводле звестак літоўскай вайсковай выведкі, у манеўрах возьмуць удзел да 30 тысяч вайскоўцаў.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.