Грамадзянін Беларусі спрабаваў таемна правезці з Літвы 10 ноўтбукаў, яму пагражае штраф

1 верасня, Позірк. 37-гадовы грамадзянін Беларусі спрабаваў таемна завезці з Літвы партыю тэхнікі, вынікае з інфармацыі Дзяржаўнага мытнага камітэта.

Паводле інфармацыі ведамства, пры надглядзе грузавіка “Мэрсэдэс” у пункце пропуску Каменны Лог (з літоўскага боку — Мядзінінкай) мытнікі знайшлі 10 ноўтбукаў, схаваных у “бакавых сценках тэхналагічных скрынь”.

“Да рашэння суда вынятыя як тавары, так і седлавы цягач 2019 г. в. Агульны ацэнкавы кошт вынятага склаў каля 225 тыс. рублёў (75,7 тыс. долараў паводле актуальнага курсу Нацбанка. — “Позірк”.)”, — гаворыцца ў паведамленні.

У дачыненні да кіроўцы распачаты адміністрацыйны працэс паводле ч. 2 арт. 15.1 КаАП (перамяшчэнне тавараў, якія трапляюць пад мытнае дэклараванне, праз мытную мяжу Еўразійскага эканамічнага саюза з утойваннем ад мытнага кантролю, то бок з выкарыстаннем тайнікоў або іншых спосабаў, якія абцяжарваюць іх выяўленне, або з наданнем адным таварам віду іншых тавараў, а таксама спроба такога перамяшчэння).

У адпаведнасці з гэтым артыкулам для фізічных асоб прадугледжаны штраф да 30 базавых велічынь (1.260 рублёў), індывідуальных прадпрымальнікаў — да 100 б.в. (4.200 рублёў), юрыдычных асоб — да 500 б.в. (21 тыс. рублёў) з магчымай канфіскацыяй тавараў і транспартных сродкаў, якія выкарыстоўваюцца для іх перамяшчэння.