У Смаргонскім раёне ад удару токам загінуў 56-гадовы электрык

2 верасня, Позірк. Пра гібель электрыка ў Смаргонскім раёне (Гродзенская вобласць) паведаміў 2 верасня Следчы камітэт.

Паводле звестак ведамства, 30 жніўня 56-гадовы мужчына “ўсталёўваў на адным з участкаў садовага таварыства электрычны шчыт вонкавага ўліку”, падчас выканання работ ён “атрымаў смяротны электрычны разрад”.

На месцы здарэння працавала следча-аператыўная група.

“Следчыя высветлілі, што мужчына пагрэбаваў правіламі бяспекі і адключыў толькі частку электразабеспячэння ў садовым таварыстве, пакінуўшы пад напругай палову правадоў”, — гаворыцца ў паведамленні.

СК абяцае ўстанавіць “усе абставіны здарэння”.

У Беларусі людзі гінуць на працоўных месцах сістэматычна.

9 студзеня на будаўніцтве комплексу “Мінск-Свет” 41-гадовы мантажнік сарваўся з дзясятага паверха і загінуў.

11 чэрвеня ў Мачулішчах (Мінскі раён) падчас будаўнічых работ на вул. Авіятараў абарваліся тросы калыскі, якая знаходзілася на ўзроўні чацвёртага паверха. У выніку падзення загінуў 65-гадовы рабочы. Яго 50-гадовага калегу даставілі ў рэанімацыю з множнымі пераломамі.

22 чэрвеня 37-гадовы мужчына, прыцягнуты да зносу будынка ў Валожынскім раёне (Мінская вобласць), загінуў з-за абвальвання бетоннай пліты сцяны-перакрыцця.

14 ліпеня ў Наваполацку (Віцебская вобласць) на будаўнічым аб’екце загінуў 27-гадовы падсобны рабочы. Ён спатыкнуўся на вышыні больш за 8 метраў і ўпаў на бетоннае пакрыццё.

18 ліпеня на будоўлі ў Новалукомлі (Віцебская вобласць) 35-гадовы падсобны рабочы падышоў да драўляных парэнчаў, якія агароджвалі балкон на ўзроўні трэцяга паверха, абапёрся і разам з імі паваліўся ўніз. Ад атрыманых траўмаў мужчына памёр у бальніцы.

27 ліпеня Следчы камітэт паведаміў, што двое мужчын (43 і 25 гадоў) загінулі ад удару токам, калі “ажыццяўлялі перавешванне сейсмічнага кабеля праз аўтадарогу М-10”. Адзначалася, што падчас работ “яны закранулі металічным абсталяваннем лінію электраперадач”. Паводле звестак рэгіянальнага медыя “Флагшток“, загінулыя былі супрацоўнікамі РУП ВА “Беларуснафта”.

6 жніўня на будаўніцтве аб’екта па вул. Танкавай у Мінску 43-гадовы падсобны рабочы спатыкнуўся і ўпаў з вышыні трэцяга паверха на бетонныя прыступкі. Ад атрыманых траўмаў ён памёр.

11 жніўня на 49-гадовага рабочага, які выконваў будаўнічыя работы на тэрыторыі сельгаспрадпрыемства ў Кобрынскім раёне (Брэсцкая вобласць), упала бетонная пліта. Мужчына атрымаў смяротныя траўмы.

14 жніўня ў Бабруйску (Магілёўская вобласць) рознарабочы сарваўся з вышыні і загінуў.

У Докшыцкім раёне (Віцебская вобласць) 19 жніўня пры рубцы лесу загінуў 46-гадовы рабочы. Паводле звестак СК, “сухая елка павалілася на грузчыка” ў выніку вібрацыі, выкліканай падзеннем спілаванай асіны.

Як паведаміў на прэс-канферэнцыі 24 красавіка дырэктар дэпартамента дзяржаўнай інспекцыі працы Міністэрства працы і сацыяльнай абароны Аляксандр Семіч, у 2024 годзе траўмы на вытворчасці атрымала 1.849 чалавек — на аднаго менш, чым у 2023-м (1.850). Колькасць загінулых скарацілася за год на 10,3% (з 117 да 105).

Летась 17 пацярпелых былі маладзейшыя за 18 гадоў, двое з іх загінулі.

74% сярод усіх пацярпелых — мужчыны, сярод загінулых іх 96,2%. Такая прапорцыя “назіраецца ўжо не першы год”. Гэта, на думку Семіча, кажа пра тое, што на працы “жанчыны больш спакойныя і дысцыплінаваныя”. “Партрэт загінулага — мужчына 44–45 гадоў”, — адзначыў прадстаўнік Мінпрацы.

У пяцёрку самых траўманебяспечных прафесій уваходзяць кіроўца аўтамабіля, слесар, дапаможны рабочы, трактарыст, жывёлавод.