Сілавыя структуры атрымалі права блакаваць інтэрнэт-рэсурсы

4 верасня, Позірк. Пастанова № 476 “Аб парадку прымянення мер абмежавальнага характару” прынятая ўрадам, 4 верасня дакумент апублікаваны на Нацыянальным прававым інтэрнэт партале.

Пастанова ўстанаўлівае “парадак абмежавання (аднаўлення) доступу да інтэрнэт-рэсурсу і прымянення мер абмежавальнага характару па спыненні, прыпыненні і аднаўленні аказання паслуг электрасувязі, інтэрнэт-паслуг”.

Згодна з дакументам, абмяжоўваць доступ да інтэрнэт-рэсурсаў змогуць сілавыя структуры: Міністэрства ўнутраных спраў, Камітэт дзяржбяспекі, Следчы камітэт, Генеральная пракуратура.

Не пазней аднаго працоўнага дня пасля прыняцця такога рашэння яно павінна быць накіравана ў Дзяржаўную інспекцыю па электрасувязі Міністэрства сувязі і інфарматызацыі. Пасля гэтага адпаведны рэсурс будзе ўключаны ў пералік з абмежаваным доступам.

У пастанове гаворыцца, што пастаўшчыкі інтэрнэт-паслуг на працягу чатырох гадзін пасля ўключэння інтэрнэт-рэсурсу ў спіс “ажыццяўляюць арганізацыйна-тэхнічныя мерапрыемствы” па абмежаванні доступу да яго. “Пры наяўнасці тэхнічнай магчымасці” яны таксама забяспечваюць “інфармаванне карыстальнікаў аб абмежаванні”.

Рашэнне аб абмежаванні доступу да інтэрнэт-рэсурсу прымаецца па матэрыялах праверкі або крымінальнай справы, яно павінна ўтрымліваць звесткі “аб выяўленым парушэнні закона, прычынах і ўмовах, якія спрыяюць здзяйснення злачынства”.

Адзначаецца, што доступ да інтэрнэт-рэсурсу можа быць абмежаваны на шэсць месяцаў, калі “іншае не пазначана ў рашэнні”.

Дакумент прадугледжвае аднаўленне доступу да інтэрнэт-рэсурсу па рашэнні тых жа органаў, якія абмежаванне ўводзілі.

Прычынай адмовы ў аднаўленні доступу з’яўляецца “неўстараненне парушэнняў, якія паслужылі падставай для абмежавання доступу, наяўнасць іншых выяўленых у ходзе разгляду заявы ўладальніка інтэрнэт-рэсурсу парушэнняў закона, прычын і ўмоў, якія спрыяюць здзяйсненню злачынстваў, альбо аб’ектыўнай немагчымасці дакладнага пацверджання ліквідацыі парушэнняў, якія паслужылі падставай для абмежавання доступу да інтэрнэт-рэсурсу”.

Цяпер права блакавання інтэрнэт-рэсурсаў на тэрыторыі Беларусі мае Міністэрства інфармацыі.

Пасля падзей 2020 года ўлады ўзмацнілі кантроль за распаўсюджваннем інфармацыі ў інтэрнэце. Крытыка рэжыму Аляксандра Лукашэнкі прыводзіць да прызнання інтэрнэт-рэсурсаў “экстрэмісцкімі”, дэ-факта пераводзячы іх у разрад забароненых і пераследуемых. “Экстрэмісцкімі” ў Беларусі за апошнія пяць гадоў прызнана большасць незалежных СМІ.