Жыхар Столінскага раёна застрэліў 14 чужых гусей з незарэгістраванай пнеўматычнай вінтоўкі

4 верасня, Позірк. Жыхар Столінскага раёна Брэсцкай вобласці ў ліпені застрэліў з пнеўматычнай вінтоўкі 14 хатніх гусей, якія належалі жыхару Жыткавіцкага раёна Гомельскай вобласці, паведаміў 4 верасня Дзяржаўны камітэт судовых экспертыз (ДКСЭ).

Паводле інфармацыі камітэта, птушка “пасвілася на меліярацыйным канале недалёка ад дома пацярпелага”. Апошні звярнуўся з заявай у мясцовы РАУС, дзе і ўстанавілі вінаватага.

ДКСЭ паведамляе, што праведзеная яго спецыялістамі па Гомельскай вобласці судовая балістычная экспертыза паказала, што “канфіскаваная пнеўматычная газабалонная вінтоўка выраблена заводскім спосабам“.

“Аднак яна выявілася прыдатнай для стральбы несферычнымі кулямі, а сярэдняе значэнне яе дульнай энергіі перавысіла 20 Дж, што значна вышэй за парог у 7,5 Дж, усталяваны для пнеўматычнай зброі, дазволенай да свабоднага абароту без рэгістрацыі“, — адзначаецца ў паведамленні камітэта.