Дзеянні Масквы і Мінска пагражаюць усяму рэгіёну — МЗС Польшчы, Літвы і Украіны

11 верасня, Позірк. Дзеянні Расіі і згода Беларусі на выкарыстанне яе паветранай прасторы ў ваенных мэтах уяўляюць прамую пагрозу бяспецы для ўсіх краін рэгіёну, гаворыцца ў сумеснай заяве міністраў замежных спраў Літвы Кястуціса Будрыса, Польшчы Радаслава Сікорскага і Украіны Андрэя Сібігі.

Дакумент ад імя кіраўнікоў МЗС краін “Люблінскага трыкутніка” апублікаваны 11 верасня на сайце знешнепалітычнага ведамства Польшчы.

Падпісанты “рашуча асудзілі нядаўняе ўварванне расійскіх беспілотнікаў на тэрыторыю Польшчы”: “Гэта быў наўмысны і скаардынаваны напад, які прадстаўляў сабой беспрэцэдэнтную правакацыю і эскалацыю напружанасці”.

Адзначаецца, што гэты інцыдэнт справакаваў таксама “рост аб’ёмаў расійскай дэзінфармацыі”. Міністры заклікалі да захавання пільнасці і ўсведамлення спроб “распаўсюджвання шкоднаснай расійскай дэзінфармацыі”.

“Разам Літва, Польшча і Украіна пацвярджаюць, што адзінства, сіла і супрацоўніцтва, асабліва з нашымі саюзнікамі і партнёрамі па НАТО і ЕС, з’яўляюцца адзіным эфектыўным спосабам процідзеяння расійскай агрэсіі і забеспячэння бяспекі нашых краін”, — падкрэсліваецца ў заяве.