Улады плануюць увесці абавязковае дактыласкапаванне ўладальнікаў замежных ВНЖ

12 верасня, Позірк. Абавязковую дзяржаўную дактыласкапічную рэгістрацыю плануецца ўвесці ў Беларусі ў дачыненні да грамадзян краіны, якія маюць від на жыхарства або грамадзянства іншых дзяржаў, вынікае з праекта закона, апублікаванага 12 верасня на Нацыянальным прававым партале.

З дакумента вынікае, што ён ужо ўхвалены Палатай прадстаўнікоў і Саветам Рэспублікі Нацыянальнага сходу. Законапраект будзе накіраваны на подпіс Аляксандру Лукашэнку.

Праект уносіць змены ў закон ад 4 лістапада 2003 года № 236-З “Аб дзяржаўнай дактыласкапічнай рэгістрацыі”. Дакумент сярод іншага прапануецца дапоўніць падпунктам 1.101.

Ён прадугледжвае, што абавязковай дактыласкапіі падлягаюць грамадзяне Беларусі на тэрыторыі краіны (у тым ліку пры выдачы (абмене) дакументаў), якія:

набылі грамадзянства (падданства) замежнай дзяржавы або атрымалі від на жыхарства ці іншы дакумент замежнай дзяржавы, які прадстаўляе права на льготы і іншыя перавагі ў сувязі з палітычнымі, рэлігійнымі поглядамі або нацыянальнай прыналежнасцю, якія праінфармавалі пра гэта органы ўнутраных спраў або дыпламатычныя прадстаўніцтвы Беларусі ва ўстаноўленым парадку;

пастаянна пражываюць за межамі Беларусі і сталі на консульскі ўлік, аформілі выезд для пастаяннага пражывання за межамі краіны ў дыпламатычных прадстаўніцтвах.

Для названых катэгорыі працэдура будзе праводзіцца “па накіраванні ўпаўнаважаных дзяржаўных органаў”, гаворыцца ў дакуменце.

Выключэнне зроблена для непаўналетніх, якія не дасягнулі 14-гадовага ўзросту, і асоб, якія дасягнулі 75-гадовага ўзросту.

Таксама прапануецца дапоўніць закон падпунктам 1.12, які прадугледжвае абавязковую дактыласкапію для асоб, якія “ў сілу стану здароўя або ўзросту на момант устанаўлення іх асобы не здольныя паведаміць пра сябе звесткі даступнымі для разумення спосабамі”, а таксама для грамадзян, якія “адмаўляюцца паведаміць пра сябе звесткі”, і без вестак зніклых асоб, “месцазнаходжанне якіх на тэрыторыі Рэспублікі Беларусь устаноўлена”.

У ліпені паведамлялася, што ў Беларусі плануецца пашырыць кола асоб, якія падлягаюць абавязковаму дактыласкапаванню. Пра гэта паведамляла прэс-служба Савета Рэспублікі Нацыянальнага сходу (СР НС).

Адпаведная прапанова змяшчаецца ў праекце закона “Аб змене законаў”, прыняцце якога адкарэктуе законы “Аб дзяржаўнай дактыласкапічнай рэгістрацыі”, “Аб дзяржаўнай мяжы Рэспублікі Беларусь”, “Аб органах памежнай службы Рэспублікі Беларусь”,“ Аб прававым становішчы замежных грамадзян і асоб без грамадзянства ў Рэспубліцы Беларусь”.

Законапраект абмяркоўваўся 30 ліпеня на пасяджэнні экспертнага савета пад кіраўніцтвам старшыні СР НС Наталлі Качанавай.

Дакумент прадугледжвае правядзенне дзяржаўнай дактыласкапічнай рэгістрацыі замежных грамадзян, асоб без грамадзянства і беларускіх грамадзян на тэрыторыі Беларусі ў адпаведнасці з “пералікам асоб, якія падлягаюць абавязковай дактыласкапічнай рэгістрацыі”. Сам пералік не прыводзіцца.

“Рэалізацыя палажэнняў праекта закона будзе садзейнічаць забеспячэнню грамадскай бяспекі і бяспекі жыццядзейнасці насельніцтва, зніжэння ўзроўню злачыннасці і крыміналізацыі грамадства, а таксама забеспячэнню нацыянальнай бяспекі ў частцы своечасовага папярэджання, выяўлення і спынення экстрэмісцкай дзейнасці, ўстанаўлення асоб, якія маюць дачыненне да такой дзейнасці”, — сцвярджала прэс-служба верхняй палаты парламента.