Ярашук: Калонія ў Шклове — фабрыка катаванняў

12 верасня, Позірк. Шклоўская калонія № 17 (Магілёўская вобласць) з’яўляецца “фабрыкай катаванняў”, якой “асабіста кіруе палкоўнік Аляксандр Карніенка — ён, відаць, вельмі хоча стаць генералам”, заявіў на прэс-канферэнцыі ў Вільнюсе 12 верасня былы старшыня Беларускага кангрэса дэмакратычных прафсаюзаў (БКДП) Аляксандр Ярашук — экс-палітвязень, вызвалены напярэдадні і дэпартаваны ў Літву.

Былы палітвязень згадаў, што, яшчэ не адбыўшы каранціну, трапіў у штрафны ізалятар: “Самы жорсткі і жахлівы ШІЗА ў Беларусі знаходзіцца менавіта ў Шклове. Першую ноч я думаў, што не перажыву. Але ў свае 72 гады я яе перажыў. Пасля гэтага я зразумеў, што больш ніхто і ніколі не зможа нада мной узяць верх. І ў той жа дзень, калі не мог спаць, таму што кожныя 15 хвілін ты вымушаны падымацца, прысядаць і адціскацца ад падлогі, бо інакш ад холаду замерзнеш, я сам сабе сказаў: пайшлі вы далёка-далёка, і пачаў спяваць”.

Паводле Ярашука, падчас зняволення і ў падчас дэпартацыі ён бачыў у асноўным людзей у масках: “Дык хто гаспадары ў краіне? Калі яны, то чаго так баяцца? Яны ведаюць, што раней ці пазней за ўсё давядзецца адказваць. У тым ліку і за тыя пашпарты, якія ў нас скралі” (вызваленых выдварылі ў Літву без пашпартоў. — “Позірк”.).

Яны, у разуменні Ярашука, “фактычна пазбаўленыя грамадзянства”.

Пры гэтым ён паабяцаў абавязкова вярнуцца ў Беларусь: “Мы справядлівыя гаспадары нашай краіны, нашай любай Беларусі”.

Сілу вытрымаць у “тых нечалавечых умовах” палітвязням “даў беларускі народ”, заявіў экс-кіраўнік БКДП.

Ярашук таксама падзякаваў за падтрымку сваёй сям’і.

18–19 красавіка 2022 года па Беларусі пракацілася хваля ператрусаў і затрыманняў актывістаў незалежнага прафсаюзнага руху. У СІЗА КДБ змясцілі лідара прафсаюза РЭП Генадзя Фядыніча, прафсаюзнага актывіста Вацлава Арэшку, намесніка старшыні БКДП Сяргея Антусевіча, кіраўніка суполкі Свабоднага прафсаюза Беларускага (СПБ) Мікалая Шараха і намесніка старшыні Свабоднага прафсаюза металургаў (СПМ) Аляксандра Еўдакімчыка (пазней усе незалежныя прафсаюзы, што ўваходзілі ў структуру БКДП, былі ліквідаваныя).

Былі затрыманыя лідар БКДП Аляксандр Ярашук, старшыня СПМ Аляксандр Бухвостаў, актывісты Віталь Чычмароў, Ірына Бут-Гусаім, Ігар Леднік. Апошні памёр 20 лютага 2024 года ў Мінскай раённай бальніцы (афіцыйна — ад спынення сэрца). Туды яго даставілі з бабруйскай калоніі № 2 (Магілёўская вобласць), дзе мужчына адбываў прызначаны ў рамках палітычна матываванай справы тэрмін пакарання — 3 гады пазбаўлення волі.

26 снежня 2022 года Мінскі гарадскі суд прыгаварыў старшыню БКДП Аляксандра Ярашука (цяпер яму 72 гады) да чатырох гадоў пазбаўлення волі, яго намесніка Сяргея Антусевіча — да 2, бухгалтара Ірыну Бут-Гусаім — да 1,5 (апошнія двое ўжо на волі). Іх прызналі вінаватымі паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх). Акрамя таго, паводле ч. 3 арт. 361 КК (заклікі да мер абмежавальнага характару, іншых дзеянняў, накіраваных на прычыненне шкоды нацбяспецы) асобна прызнаны вінаватым Ярашук, які неаднаразова публічна выступаў супраць санкцый.

Паводле інфармацыі праваабарончага цэнтра “Вясна”, толькі з красавіка 2022 года да жнівень 2023-га ў Беларусі было затрымана больш за 35 прадстаўнікоў незалежных прафсаюзаў. Акрамя кіраўніцтва і сябраў згаданых прафарганізацый, рэпрэсіі зазналі прафсаюзныя актывісты на прадпрыемствах “Гродна Азот”, “Нафтан”, “Беларуськалій” і інш.