Восем банкаў абвясцілі аб новаўвядзеннях у працы з кліентамі
14 верасня, Позірк. Восем банкаў, якія працуюць у Беларусі, паведамілі аб змене асобных правілаў абслугоўвання і прадставілі новыя магчымасці для кліентаў, сведчыць праведзены “Позіркам” маніторынг іх актуальных прэс-рэлізаў.
“Банк БелВЭБ” знізіў стаўку з 19,1% да 17,9% гадавых па крэдыце на набыццё жылой нерухомасці, лецішча, садовага доміка, гаража (машына-месца). Сума крэдыту — да 90% ад кошту аб’екта, у межах плацежаздольнасці кліента. Акрамя таго, прадастаўляецца магчымасць рэфінансавання. Крэдыт можна аформіць у любым офісе банка на тэрмін да 20 гадоў.
Банк “ВТБ (Беларусь)” больш не адкрывае бягучыя (разліковыя) рахункі ў еўра, доступ да якіх забяспечваўся праз выкарыстанне банкаўскіх плацежных карт “Камплімент Gold”, “Фарсаж World”, “Плацежная Signature прывілей Лайт”, “Плацежная Infinite прывілей Лайт” і “Плацежная Gold”. Змены тычацца толькі новых дамоваў. Дзеючыя рахункі кліентаў працягнуць функцыянаваць у ранейшым парадку.
“Белінвестбанк” аднавіў прыём (без абмежавання па намінале) на інкаса банкнот замежнай валюты (долары, еўра, расійскія рублі), якія маюць пашкоджанні ў адпаведнасці з пералікам прыкмет іх плацежнасці, ад фізічных асоб. Камісійнае ўзнагароджанне банку складзе 8% ад сумы валюты (мінімум 10 рублёў).
“БНБ-Банк” пачаў спаганяць дадатковую камісію па правядзенні некаторых аперацый. У прыватнасці, за выкананне плацяжоў на рахункі атрымальнікаў, адкрытыя ў “Прыёрбанку”: у доларах — 1% ад сумы плацяжу; у еўра — 1,9%. Камісія спісваецца агульнай сумай ад усіх пераводаў, выкананых на працягу аперацыйнага дня, не пазней наступнага за ім працоўнага дня.
“БСБ Банк” увёў новую камісію па паслузе “Інтэрнэт-эквайрынг”. Для ўсіх новых і дзеючых кліентаў яна ўстаноўлена ў памеры 3,5% па аперацыях у замежнай валюце.
“Прыёрбанк” уводзіць з 22 верасня сутачныя ліміты на зняцце грошай у сваіх банкаматах з дэбетавых і крэдытных картак з выкарыстаннем токенаў (пры выкарыстанні Apple pay, Swoo pay, Samsung pay і інш.): у Беларусі — 1 тыс. рублёў; за мяжой — 500 рублёў.
“Тэхнабанк” аднавіў выплату кампенсацыі часткі ПДВ па чэках Tax Free кампаніі Planet Payment UK LTD. Рэшту сумы, у рамках якой магчымая выплата па чэках, складае 1.403,67 еўра.
“Цэптэр Банк” у рамках супрацоўніцтва з беларускай крыптавалютнай біржай BYNEX прапануе кліентам “зручна папаўняць свае кашалькі на BYNEX” (банк не будзе спаганяць камісію за папаўненне кашалька на платформе). Рэзідэнты могуць адкрыць рахункі ў чатырох валютах (доларах, еўра, беларускіх і расійскіх рублях) і выкарыстоўваць іх для папаўнення кашалька на BYNEX, а нерэзідэнты — толькі ў беларускіх рублях.
На 1 жніўня 2025 года ў Беларусі зарэгістраваны 21 банк (тры з іх — са 100-працэнтным замежным удзелам). Іх статутны капітал — 11 млрд 397,3 млн рублёў (+2,3% за месяц і +14,4% у гадавым вымярэнні).
Прыбытак банкаў, якія працуюць у Беларусі, на 1 жніўня 2025 года склаў 2 млрд 719 млн рублёў — на 35,4% больш, чым месяцам раней (2 млрд 7,5 млн), і на 27,7% больш, чым на пачатак жніўня 2024-га (2 млрд 128,8 млн), сведчыць праведзены “Позіркам” аналіз звестак Нацыянальнага банка.
У студзені — ліпені 2025 года банкі, якія працуюць у Беларусі, выдалі арганізацыям крэдытаў на 112 млрд 640,7 млн рублёў — на 9,6% больш, чым за аналагічны перыяд 2024-га (102 млрд 795,4 млн), сведчыць праведзены “Позіркам” аналіз звестак Нацыянальнага банка.
На дзяржаўны сектар эканомікі прыпала 30,3% выдадзеных крэдытных сродкаў, на прыватны — 69,7%.
Дзяржсектар за гэты час пракрэдытаваны на 34 млрд 108,9 млн рублёў (31 млрд 931,6 млн; +6,8%), недзяржаўны атрымаў 78 млрд 531,9 млн (70 млрд 863,8 млн; +10,8%).
Запазычанасць па рублёвых і валютных крэдытах, выдадзеных банкамі юрыдычным асобам, на 1 жніўня 2025 года склала 61 млрд 172,3 млн рублёў, сведчаць даныя рэгулятара.
Праведзены “Позіркам” аналіз паказаў, што актуальная сума запазычанасці на 12,4% большая, чым было на 1 жніўня 2024-га (54 млрд 404,5 млн рублёў), і на 3,8% большая, чым на 1 студзеня 2025-га (58 млрд 952,8 млн).
Пратэрмінаваная запазычанасць на 1 жніўня склала 255,3 млн рублёў (+4,5%). На 1 студзеня яна складала 733,5 млн рублёў (зніжэнне амаль у 2,9 раза).
Запазычанасць фізічных асоб па крэдытах на 1 жніўня 2025 года склала 28 млрд 192,3 млн рублёў (год таму — 22 млрд 812,6 млн; +20,6%). Пратэрмінаваная — 48 млн рублёў (40,4 млн; +18,8%).
Гл. таксама:
Лукашэнка: Ці не моцна расслабіліся ў Нацбанку, апусціўшы павады ў кіраванні даходамі банкаў?
Лукашэнка пра эканоміку пад санкцыямі: Цяжка дагэтуль, наўрад ці будзе лягчэй і надалей
