Кіраўнік ДМК: Ад закрыцця мяжы пацярпела сама Польшча і краіны, якія не маюць дачынення “да гэтай сітуацыі”

16 верасня, Позірк. Польшча закрыццём мяжы нашкодзіла свайму бізнесу, пацярпелі і краіны, “якія наогул да гэтай сітуацыі ніякага абсалютна дачынення не маюць”, заявіў у інтэрв’ю тэлеканалу “Беларусь 1” кіраўнік Дзяржаўнага мытнага камітэта (ДМК) Уладзімір Арлоўскі пасля сустрэчы з Аляксандрам Лукашэнкам 15 верасня.

У электроннай чарзе на выезд з Беларусі ў Польшчу перад пунктам пропуску Казловічы зарэгістравана 1,7 тыс. грузавікоў, тысяча з іх — “на польскай рэгістрацыі”: “Гэта значыць вось гэтыя машыны, яны стаяць і чакаюць, калі будзе адкрыта мяжа”.

Паводле Арлоўскага, што “яшчэ пяць-шэсць гадоў таму 80% грузаў, як у Беларусь, так і з Беларусі ішлі праз заходні ўчастак мяжы і толькі 20% праз усходні”. Цяпер “сітуацыя цалкам памянялася, гэта значыць 82% гэта ўсходняя мяжа, 18% усяго — заходняя”.

У ведамстве прааналізавалі ўезд і выезд праз беларускую мяжу ў ЕС і высветлілі, што “імпарт Польшчы ў бок Захаду гэта 64%, экспарт у ЕС — таксама Польшча галоўны бенефіцыяр”.

Паводле кіраўніка ДМК, у Польшчы, закрыўшы мяжу, “закрылі сабе бізнес, фактычна, рух тавараў”, а таксама “нашкодзілі іншым краінам”.

“Калі ўзяць з усходу грузапаток, то нашы беларускія, расійскія тавары, складаюць менш за палову, а больш за палову гэта Кітай, Казахстан, Узбекістан. Гэта значыць краіны, якія наогул да гэтай сітуацыі ніякага абсалютна дачынення не маюць, а яны пацярпелі больш за ўсіх”, — заявіў Арлоўскі.

У кіраўніка мытнага камітэта “няма сумненняў” у аднаўленні працы пунктаў пропуску не толькі з Польшчай, але і тых, “якія раней закрывалі“.

Раней у той жа дзень Арлоўскі заявіў, што беларускі бок гатовы да аднаўлення працы ў любым пункце пропуску на мяжы, калі “будзе на тое добрая воля суседзяў”.

Арлоўскі паведаміў таксама, што ўжо некалькі гадоў у ДМК “практычна няма” кантактаў “ні з Польшчай, ні з Літвой, ні з Латвіяй”, захоўваецца ўзаемадзеянне толькі “непасрэдна на лініі граніцы, у пунктах пропуску”, гэта датычыцца “тэхнічных пытанняў”.

Паводле Арлоўскага, польскія ўлады закрыццём мяжы “падвялі сваіх жа партнёраў як у Еўрапейскім саюзе, так і іншых рэгіёнах свету, у тым ліку з Кітая”, бо “практычна трэць грузаў, якія ідуць праз мяжу Беларусі і Польшчы на ​​захад, складаюць тавары кітайскага паходжання”.

Польшча закрыла ўсе кантрольна-прапускныя пункты на мяжы з Беларуссю, уключаючы адзіны КПП Тэрэспаль (Брэст), які выкарыстоўваўся для пропуску легкавых аўтамабіляў, з 0 гадзін па польскім часе (1 гадзіна па мінскім часе) 12 верасня “да адмены рашэння”. Падставай паслужылі сумесныя з РФ ваенныя вучэнні “Захад-2025” на тэрыторыі Беларусі.

Мяжа Беларусі з Польшчай выкарыстоўваецца Кітаем для транзіту сваіх тавараў у краіны Еўрасаюза. 24 чэрвеня 2024 года тагачасны прэзідэнт прэзідэнт Польшчы Анджэй Дуда абмеркаваў у Пекіне з лідэрам КНР Сі Цзіньпінам крызіс на беларуска-польскай мяжы. Паводле слоў Дуды, “гібрыдная атака” (так ён назваў спробы масавага пранікнення нелегалаў з трэціх краін з тэрыторыі Беларусі), што працягваюцца з вясны 2021 года, на мяжы стала перашкодай для рэалізацыі кітайскай ініцыятывы “Пояс і шлях”.

15 верасня ў Варшаве (Польшча) прайшла сустрэча міністраў замежных спраў гэтай краіны і КНР Радаслава Сікорскага і Ван І. Бакі “прызналі выгады ад прадастаўлення ўзаемавыгадных паслуг па перавозцы грузаў чыгуначным, марскім і паветраным транспартам, а таксама ад умацавання існуючых і патэнцыйных маршрутаў і лагістычных ланцужкоў”.

Пра тое, што Польшча не адкрые мяжу з Беларуссю пасля заканчэння беларуска-расійскіх вучэнняў “Захад-2025”, якія завяршаюцца 16 верасня, заявіла Міністэрства ўнутраных спраў і адміністрацыі Польшчы.