16 верасня, Позірк. Польшча не адкрые мяжу з Беларуссю пасля заканчэння беларуска-расійскіх вучэнняў “Захад-2025”, якія завяршаюцца 16 верасня, вынікае з апублікаванай заявы прэс-сакратара Міністэрства ўнутраных спраў і адміністрацыі (МУСДіА) Польшчы.
У ім, у прыватнасці, адзначана, што рашэнне аб закрыцці мяжы “дзейнічае да далейшага апавяшчэння і прадыктавана клопатам аб бяспецы грамадзян Польшчы”.
“Забеспячэнне бяспекі нашых грамадзян з’яўляецца нашым прыярытэтам. Падкрэсліваем, што гэтае рашэнне звязана з расійска-беларускімі вучэннямі “Захад-2025″, што не азначае, што мяжа будзе закрыта выключна на час гэтых вучэнняў”, — гаворыцца ў заяве.
Рух будзе адноўлены, “калі мяжа, паводле інфармацыі, прадстаўленай адпаведнымі службамі, будзе ў поўнай бяспецы”.
“Мы ўсведамляем, што прыпыненне прыгранічнага руху з’яўляецца праблемай для перавозчыкаў, якім для ажыццяўлення перавозак даводзіцца выкарыстоўваць пагранічныя пераходы, напрыклад, у Літве”, — канстатуе ведамства.
Адначасова МУСіА падкрэсліла, што “па эканамічных меркаваннях і на карысць польскіх прадпрымальнікаў” зробіць “усё магчымае, каб перыяд выключэння прыгранічнага руху быў як мага менш цяжкім” для прадстаўнікоў бізнесу.
“Ацэнка страт будзе праведзена пасля таго, як стане вядома, як доўга будзе закрыта мяжа. Пасля гэтага міністэрствы змогуць падрыхтаваць адпаведныя разлікі. На іх аснове ўрад будзе прымаць рашэнні аб магчымай дзяржаўнай падтрымцы асобных галін”, — паабяцалі ў міністэрстве.
Польшча закрыла ўсе кантрольна-прапускныя пункты на мяжы з Беларуссю, уключаючы адзіны КПП Тэрэспаль (Брэст), які выкарыстоўваўся для пропуску легкавых аўтамабіляў, з 0 гадзін па польскім часе (1 гадзіна па мінскім часе) 12 верасня “да адмены рашэння”. Падставай паслужылі сумесныя з РФ ваенныя вучэнні “Захад-2025” на тэрыторыі Беларусі.
