У Брэсцкай вобласці пройдзе дзясятая ад пачатку года праверка сістэмы апавяшчэння насельніцтва
22 верасня, Позірк. Праверка сістэмы апавяшчэння насельніцтва, падчас якой будуць гучаць электрасірэны, пройдзе ў Брэсцкай вобласці 23 верасня — з 12:00 да 13:00, паведаміла Міністэрства па надзвычайных сітуацыях.
МНС традыцыйна заклікала грамадзян “захоўваць спакой” і не рабіць “ніякіх дзеянняў”.
Сёлета гэта будзе дзясятая праверка сістэмы апавяшчэння ў Брэсцкай вобласці, якая мяжуе з Украінай і Польшчай. Раней яна праводзілася 9 верасня, 12 жніўня, 21 і 8 ліпеня, 30 і 10 чэрвеня, 27 траўня, 22 і 8 красавіка.
У Гомельскай вобласці выпрабаванні праходзілі 18 верасня, 21 жніўня, 17 ліпеня, 19 чэрвеня, 20 сакавіка і 30 студзеня, у Мінскай — 10 верасня, 13 жніўня, 11 чэрвеня і 16 красавіка, у Магілёўскай — 18 верасня, у горадзе Магілёве сістэма тэставалася ў рамках вучэнняў 15–17 красавіка.
13 сакавіка планавая праверка сістэмы апавяшчэння прайшла па ўсёй Беларусі.
Адметна, што праверкі праводзяцца ў тым ліку ў абласцях, якія мяжуюць з Украінай, куды рэгулярна ўрываюцца беспілотныя лятучыя апараты, якія, як мяркуецца, належаць Расіі.
У Беларусі зафіксавана некалькі выпадкаў падзення дронаў на будынкі (у тым ліку ў Мінску), аднак інфармацыі пра тое, што пры гэтым актывавалася сістэма апавяшчэння, няма.
З пачатку поўнамаштабнай вайны РФ супраць Украіны праверкі сістэм апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.
