Ціханоўская вітала адкрыццё Польшчай мяжы з Беларуссю, адзначыўшы “канструктыўную ролю” Кітая

23 верасня, Позірк. Дэмакратычны лідар Святлана Ціханоўская вітала адкрыццё Польшчай мяжы з Беларуссю.

“Я вельмі рада”, — адзначыла палітык у сваім тэлеграм-канале.

“Вольнае перамяшчэнне беларусаў праз мяжу мае жыццёва важнае значэнне, бо гэта магчымасць абдымаць блізкіх, вучыцца, працаваць — бачыць вольную Еўропу ўласнымі вачыма”, — падкрэсліла яна, падзякаваўшы польскаму боку.

Паводле слоў Ціханоўскай, Варшава “вымушана дзейнічаць ва ўмовах правакацый з боку рэжыму Лукашэнкі”, праз што “пакутуюць беларусы”.

“Неабходна таксама адзначыць канструктыўную ролю Кітая ў гэтай сітуацыі. Візіты ў Варшаву і Мінск паспрыялі гэтаму рашэнню”, — падкрэсліла дэмлідар.

“Эканамічны ціск і кантроль за рухам тавараў — гэта тое, што прымушае Лукашэнку ісці на саступкі. Менавіта праз штучна створаны міграцыйны крызіс і рэгулярныя парушэнні паветранай прасторы краіны-суседзі былі вымушаныя абараняцца і адгароджвацца”, — дадала палітык.

Рэжым Лукашэнкі, паводле яе слоў, павінен спыніць “міграцыйныя атакі і рэпрэсіі, вызваліць і рэабілітаваць палітвязняў”, “беларускае неба павінна быць сапраўды мірным — без баявых дронаў”.

“Беларусь будзе бяспечнай краінай і надзейным суседам — такой, якой яе хочуць бачыць беларусы”, — адзначыла Ціханоўская.

Польшча закрыла ўсе кантрольна-прапускныя пункты на мяжы з Беларуссю, у тым ліку адзіны, які выкарыстоўваўся для пропуску легкавых аўтамабіляў, КПП “Цярэспаль” (Брэст), 12 верасня — у першы дзень беларуска-расійскіх стратэгічных вучэнняў “Захад-2025”, якія і сталі нагодай для такога рашэння.

У апошні дзень манеўраў, 16 верасня, стала вядома, што Варшава па заканчэнні вучэнняў не адкрыла мяжу.

23 верасня прэм’ер-міністр Польшчы Дональд Туск паведаміў, што мяжа з Беларуссю будзе адкрытая апоўначы 25 верасня (1:00 па беларускім часе), аднак падкрэсліў, што ў выпадку неабходнасці — калі “ўзмоцніцца напружанасць або агрэсіўныя паводзіны некаторых суседзяў” — урад “не будзе вагацца” і закрые мяжу зноў.

На перамовах з міністрам замежных спраў Кітая Ван І 15 верасня абмяркоўвалася пытанне закрытай паводле ініцыятывы Польшчы мяжы з Беларуссю, паведаміў кіраўнік польскага МЗС Радаслаў Сікорскі 18 верасня.