У Віцебскай вобласці пракуроры накіравалі ў суды амаль сотню заяваў аб “экстрэмісцкіх матэрыялах”

24 верасня, Позірк. З пачатку 2025 года ў Віцебскай вобласці ў суды было накіравана 95 заяў аб прызнанні інфармацыйнай прадукцыі шэрагу рэсурсаў “экстрэмісцкімі матэрыяламі”, паведамляе Генеральная пракуратура.

Як зазначае прэс-служба нагляднага органа, “значная праца па выяўленні дэструктыўнай інфармацыі праведзена пракуратурамі Полацкага, Сенненскага, Чашніцкага і Гарадоцкага раёнаў”.

Пракуратура праводзіць маніторынг інтэрнета “на наяўнасць матэрыялаў, накіраваных на павышэнне сацыяльнай напружанасці ў грамадстве і стварэнне недаверу да прадстаўнікоў органаў дзяржаўнай улады”.

Непасрэдна абласная пракуратура ініцыявала прызнанне “экстрэмісцкімі матэрыяламі” змесціва 12 старонак у сацыяльных сетках, а таксама пяці каналаў і ролікаў на “Ютубе”, трох тэлеграм-чатаў і тэлеграм-каналаў.

Мэтай такой дзейнасці названа “забеспячэнне законнасці, грамадскай бяспекі і стабільнасці ў краіне і рэгіёнах”.

2 верасня паведамлялася, што звыш 1,1 тыс. заяў аб прызнанні інфармацыйнай прадукцыі “экстрэмісцкімі матэрыяламі” падалі пракуроры Мінскай вобласці за чатыры гады.

“Экстрэмісцкія” артыкулы адміністрацыйнага і крымінальнага кодэксаў пасля падзей 2020 года актыўна выкарыстоўваюцца ўладамі для палітычнага пераследу грамадзян.

У дакладзе праваабарончых арганізацый Article 19 і Human Constanta, апублікаваным у жніўні, гаворыцца, што ў Беларусі “амаль любое іншадумства таўруюць як “экстрэмізм“ або “тэрарызм“, гэта стала “асноўным інструментам рэпрэсій“. Аўтары дакладу звярнулі ўвагу, што ў Беларусі пераслед “часта прымае абсурдныя формы — песні, мемы і анімэ рэгулярна лічацца праявамі экстрэмізму“.