У Мінску пачынаюць уключаць ацяпленне ў сацустановах

25 верасня, Позірк. Рашэнне аб уключэнні ацяплення ў спажыўцоў першай чаргі прыняў 25 верасня Мінгарвыканкам, паведамляецца ў яго тэлеграм-канале.

У гэты ж дзень ацяпленне ўключаюць у дзіцячых дашкольных, школьных, лячэбна-прафілактычных і медыцынскіх установах, а таксама ўстановах сацыяльнага забеспячэння, спецыялізаваных навучальна-спартыўных установах, музеях, дзяржаўных архівах, бібліятэках і гасцініцах.

Пачатак ацяпляльнага сезона штогод залежыць ад тэмпературы паветра ў канкрэтных рэгіёнах краіны.

У 2024 годзе ў Мінску ён пачаўся 4 кастрычніка, ва ўстановах сацыяльнай сферы — 1 кастрычніка.

У сацыяльных аб’ектах батарэі павінны ўключаць, калі сярэднесутачная тэмпература на працягу трох сутак запар не перавышае +10 °С. Ацяпляльны сезон у жыллёвым фондзе пачынаецца, калі сярэднесутачная тэмпература паветра за такі ж перыяд не перавышае +8 °С.

Паводле інфармацыі Белгідраметцэнтра, 26 верасня на большай частцы тэрыторыі краіны ў начны час чакаюцца замаразкі да -5°С, у Мінску чакаюцца замаразкі ад -1 да -3°С, аб’яўлена штармавое папярэджанне.

25 верасня Міністэрства адукацыі паведаміла аб стварэнні чат-бота ў “Тэлеграме” для зваротаў грамадзян па пытаннях тэмпературнага рэжыму ў дзіцячых садах, школах і ўстановах дадатковай адукацыі.