Ціханоўская: Калі грамадзяне Малдовы зробяць правільны выбар, гэта будзе абнадзейлівае пасланне для Беларусі

28 верасня, Позірк. Калі грамадзяне Малдовы зробяць “правільны выбар” падчас галасавання за новы склад парламента, гэта “будзе абнадзейваючым пасланнем і для Беларусі, і для іншых постсавецкіх краін”, заявіла дэмакратычны лідар Святлана Ціханоўская 28 верасня ў інтэрв’ю тэлеканалу Moldova 1.

Пасланне, паводле яе слоў, будзе заключацца ў тым, што “ўсё магчыма” — рэальна “не толькі змяніць краіну, але і захаваць гэтыя змены і супрацьстаяць расійскай прапагандзе і намерам зноў падарваць дэмакратыю”.

Палітык пажадала малдаўскім грамадзянам”захаваць тое, што ў іх ёсць цяпер”. “Мы, беларусы, як нацыя разглядаем Малдову як прыклад. Таму што ў апошнія гады Малдова ператварылася ў еўрапейскую дзяржаву. Мы разумеем, што Расія ўспрымае ўсе нашы так званыя постсавецкія краіны як дзяцей, якія не маюць права на самавызначэнне, якія не маюць права выбіраць сваю будучыню. Мы бачым, наколькі далёка прасунулася Малдова, што ёй удалося абараніць сваё права на самавызначэнне. Гэтая трансфармацыя ўражвае і ўяўляе сабой еўрапеізацыю”, — падкрэсліла Ціханоўская.

Галасаванне на выбарах у парламент Малдовы прайшло 28 верасня. У Беларусі можна было прагаласаваць у малдаўскай амбасадзе. Выбарчы ўчастак працаваў у Мінску да 21:00.

Раней паведамлялася аб прыездзе ў Мінск для галасавання грамадзян Малдовы, якія пражываюць у РФ. Паліцыя Малдовы пачала расследаванне па гэтым факце, заявіўшы аб арганізаванай дастаўцы выбаршчыкаў у Беларусь. “Арганізаваная перавозка выбаршчыкаў забароненая законам і кваліфікуецца як спроба незаконнага ўплыву на выбарчы працэс”, — заявілі ў паліцыі.

Фаварытамі на выбарах у Малдове, паводле сацапытанняў, з’яўляюцца кіроўная праеўрапейская партыя “Дзеянне і салідарнасць” прэзідэнта Маі Санду і апазіцыйны Патрыятычны выбарчы блок былога прэзідэнта Ігара Дадона, які выступае за збліжэнне з Расіяй.

На думку палітычных экспертаў, выбары ў Малдове з’яўляюцца “гістарычнымі”, бо іх вынікі могуць паўплываць на далейшы курс краіны, у прыватнасці, на перспектывы еўраінтэграцыі. Цяпер Малдова з’яўляецца кандыдатам на ўступленне ў ЕС, гэты працэс можа запаволіцца або зусім спыніцца ў выпадку прыходу да ўлады блока Дадона.

Перад выбарамі афіцыйны Кішынёў не раз заяўляў аб беспрэцэдэнтным умяшанні Масквы ў выбарчы працэс. За сувязі з Крамлём некалькі партый былі адхіленыя ад удзелу ў выбарах.

На прэзідэнцкіх выбарах у Малдове ўвосень 2024 года была пераабраная Санду. Па выніках другога тура яна набрала 55,35% галасоў выбаршчыкаў, яе апанент — падтрыманы партыяй Дадона прарасійскі палітык Аляксандр Стаяногла — 44,65%. На ўчастак для галасавання ў амбасадзе Малдовы ў Мінску масава завозіліся малдаване з Расіі, якія ў асноўным сімпатызуюць РФ. Гэта адбілася на выніках галасавання ў дыпмісіі.

Ціханоўская павіншавала Санду з перамогай на выбарах. Яна наведвала Малдову 20–21 кастрычніка 2023 года па запрашэнні Санду. У кастрычніку 2022-га ў малдаўскім парламенце была створаная група “За дэмакратычную Беларусь”.

12 ліпеня на сустрэчы ў Мінску з Дадонам Аляксандр Лукашэнка заявіў, што беларускія ўлады “гатовыя да супрацоўніцтва з Малдовай”.